प्रयागराज : भारत व पाकिस्तानमध्ये सौहार्द नांदावे अशी अपेक्षा येथील कुंभमेळ्यात आलेल्या पाकिस्तानी प्रतिनिधी मंडळातील साई साधराम यांनी व्यक्त केली. पाकिस्तानमधील काही हिंदू कुंभमेळ्यासाठी आले आहेत. सिंधमधील खासदार डॉक्टर दर्शनलाल हे देखील यानिमित्त प्रयागराज येथे त्यांच्यासमवेत आले आहेत. दर्शनलाल हे पाकिस्तान मुस्लीम लीग एन गटाचे आहेत. वादापेक्षा समन्वयातून मार्ग निघू शकतो. त्यामुळे संघर्ष करून फायदा नाही, असे साई साधराम यांनी नमूद केले. पाकिस्तानमधील परिस्थितीबाबत त्यांनी फारसे भाष्य केले नाही. मात्र आम्हाला त्याचे चटके बसले असे सांगत अप्रत्यक्षपणे तेथील स्थितीची कल्पना दिली. कुंभमेळ्यानिमित्त उभारण्यात आलेल्या कलाग्रामला पाकिस्तानी प्रतिनिधींनी भेट दिली. हा सोहळा म्हणजे सांस्कृतिक विविधतेचे उत्तम उदाहरण असल्याचे त्यांनी नमूद केले. पाकिस्तानमधील सात जणांचे हे प्रतिनिधी मंडळ आहे. लखनऊ तसेच अयोध्येतही ते भेट देणार आहे. येथे येऊन भारावून गेल्याचे त्यांनी स्पष्ट करत, कुंभनिमित्त कलाग्राममध्ये उभारलेल्या विविध दालनांना त्यांनी भेट दिली.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
