चीनने दाखवली लष्करी ताकत, भारताकडूनही मोठया युद्धसरावाची तयारी

चीनला लागून असलेल्या नियंत्रण रेषेपासून काही अंतरावर ‘हिम विजय’ युद्धसरावाची तयारी सुरु आहे. ‘हिम विजय’मधून १७ व्या ब्रह्मास्त्र कॉर्प्सला शत्रूवर सफाईदारपणे हल्ला करण्यासाठी तयार करण्यात येणार आहे. १७ कॉर्प्समधून तीन आयबीजी वेगळे काढण्यात येणार असून प्रत्येक आयबीजीमध्ये ५ हजार सैनिक आहेत.

रणगाडा, तोफखाना, हवाई सुरक्षा युनिट हवाई दलाचे सी-१७ ग्लोबमास्टर, सी-१३० जे सुपर हरक्युलस आणि एएन-३२ युद्धसरावात सहभागी होणार आहेत. महिना अखेरीस पंतप्रधान नरेंद्र मोदींसोबतच्या परिषदेसाठी चीनचे राष्ट्राध्यक्ष शी जिनपिंग भारत दौऱ्यावर येण्याची शक्यता आहे. त्यावेळी हिम विजय युद्धसराव जोरात सुरु असेल.

भारत आणि चीनमध्ये अधून-मधून सीमाप्रश्नावरुन वाद निर्माण होत असतात. दोन वर्षांपूर्वी डोकलाममध्ये भारत आणि चीनचे सैन्य आमने-सामने उभे ठाकले होते. त्यावेळी चीनने युद्धाचे इशारे दिले. पण भारतीय सैन्य एक इंचही मागे हटले नाही. अखेर ७० दिवसानंतर राजनैतिक तोडगा निघाला आणि दोन्ही देशांचे सैन्य माघारी फिरले.