काँग्रेसच्या अधिवेशनात अंतर्गत मतभेद चव्हाट्यावर, मोदी यांच्याविरोधात लढायचे कसे?

तर निवृत्त व्हा!

काँग्रेसमध्ये संघटनात्मक बदल केले जात आहेत. जे पक्षाचे काम करत नाहीत, पक्षाची जबाबदारी घेत नाहीत, अशांनी निवृत्त व्हावे. त्यांना आराम करण्याची गरज आहे, असे पक्षाध्यक्ष खरगे यांनी नेते व कार्यकर्त्यांना ठणकावले. जिल्हा काँग्रेस बळकट केल्या जातील व जिल्हाध्यक्षांना व्यापक अधिकार दिले जातील. उमेदवार निवडीमध्ये त्यांचा सहभाग असेल, असे खरगेंनी स्पष्ट केले. लोकसभेतील विरोधी पक्षनेते व काँग्रेसचे नेते राहुल गांधींनीही जिल्हा काँग्रेसला पक्षातील पाया बनवला जाईल, हा मुद्दा अधोरेखित केला. या प्रक्रियेची सुरुवात १५ एप्रिलपासून गुजरातमध्ये होईल. प्रत्येक राज्यामध्ये राहुल गांधींच्या उपस्थितीत जिल्हा काँग्रेससाठी कार्यशाळा आयोजित केली जाईल. त्यामध्ये कार्यकर्त्यांशी संवाद साधला जाईल, अशी माहिती संघटना महासचिव के. सी. वेणुगोपाल यांनी अधिवेशनामध्ये दिली.

ठरावात राष्ट्रवादाचा समावेश

काँग्रेसच्या ठरावामध्ये राष्ट्रवादाच्या मुद्द्याचा समावेश करण्यात आला आहे. जातींमध्ये वा धर्मामध्ये तेढ निर्माण करणारा संघाचा राष्ट्रवाद मान्य नसून सर्वांना एकत्र घेऊन जाणारा राष्ट्रवाद काँग्रेसला अभिप्रेत असल्याचे ठरावात नमूद करण्यात आले आहे. केरळमधील खासदार शफी परम्बिल यांनी, काँग्रेसकडे वैचारिक स्पष्टता असणे गरजेचे असल्याचा मुद्दा अधोरेखित केला. काळ बदलला आहे, लढण्याचे मैदानही बदलले आहे, विरोधकांशी लढण्यासाठी आपल्याकडे नवी आयुधेही असली पाहिजेत. वैचारिक स्पष्टतेचा धागा उत्तर प्रदेशमधील आलोक मिश्रा यांनी पकडला. काँग्रेस नेत्याचा एक मुलगा समाजवादी पक्षात तर एक भाजपमध्ये कुठल्या ना कुठल्या पदावर असेल तर असा काँग्रेस नेता शहराध्यक्ष बनण्याच्या लायकीचा तरी आहे का, असा प्रश्न त्यांनी विचारला. शहराध्यक्षांनी फक्त संघटना बळकट केली पाहिजे, असेही मिश्रा म्हणाले. भाजपशी आम्ही दोन हात करू पण, जे पक्षात काम करत आहेत, त्यांना पुढे आणा, असा मुद्दा राजस्थानमधील रेहाना यांनी मांडला.

थरूर यांचा वेगळा सूर

केरळचे खासदार शशी थरूर यांनी खरगेंच्या विचारांना छेद दिला. फक्त भाजपचे टीकाकार होऊन चालणार नाही. त्याचा काँग्रेसला फायदा मिळण्याची शक्यता नाही. उलट, सकारात्मक विचार करूनच पुढे गेले पाहिजे, असे वेगळा सूर थरूर यांनी लावला. लोकसभेच्या सलग तीन निवडणुकांमध्ये आपण पराभूत झालो, आपल्याला मतांची टक्केवारी वाढवता आली नाही. राष्ट्रवादाचा मुद्दा भाजपसारखे इतर पक्ष आपल्याकडून हिरावून घेतात, उलट, आपण राष्ट्रवादाचा मुद्दा हिरिरीने मांडला पाहिजे, असेही थरूर म्हणाले.