Iranian Chess Player : ईराणची बुद्धिबळपटू सारा खादेम (Sara Khadem) जिने हिजाब हटवून या स्पर्धेत सहभागी झाली होती त्याच साराला आता स्पेनचं नागरिकत्व मिळालं आहे. साराने डिसेंबर २०२२ मध्ये कझाकिस्तान या ठिकाणी झालेल्या बुद्धिबळ स्पर्धेत हिजाब न घालता भाग घेतला होता. यानंतर इराणने तिचा निषेध केला होता. आपल्यावर काही कारवाई होऊ नये म्हणून सारा खादेम जानेवारी महिन्यातच स्पेनला गेली होती. इराणमधे साराच्या विरोधात अटक वॉरंट लागू करण्यात आलं होतं. इराणच्या या बुद्धिबळपटू सारा खादेमला स्पॅनिश नागरिकत्व देण्यात आलं आहे. स्पेन सरकारनेच या विषयीची माहिती दिली. सारा खादेमने कझाकिस्तानमध्ये आयोजित करण्यात आलेल्या फिडे वर्ल्ड रॅपिड आणि ब्लिट्स बुद्धिबळ स्पर्धेत सहभाग घेतला होता. यावेळी तिने हिजाब न परिधान करता खेळ खेळला. ही बाब इराणच्या इस्लामिक ड्रेसकोड नियमाच्या विरोधात होती. स्पेनचे कायदा मंत्री पिलर होप यांच्या हवाल्याने एका अधिकाऱ्याने ही बाब स्पष्ट केली की तिथल्या कॅबिनेटने मंगळवारी (२५ जुलै) सारा खादेमवर ओढवलेली विशिष्ट परिस्थिती लक्षात घेता तिला स्पेनचं नागरिकत्व देण्याचा निर्णय घेतला आहे. मी पडद्यात राहू शकत नाही सारा खादेम ही जेव्हा स्पेनला आली तेव्हा तिने एका वृत्तपत्राला मुलाखत दिली. त्यावेळी तिने हे म्हटलं होतं की मला पडद्यात रहायला आवडत नाही. त्यामुळेच मी आता यापुढे हिजाब घालणार नाही असा निर्णय घेतला आहे. स्पेनमध्ये आल्यानंतर सारा खादेमने पंतप्रधान पेड्रो सांचेज यांचीही भेट घेतली तसंच त्यांच्यासह तिने बुद्धिबळाचा डावही खेळला. रॉयटर्सने हे वृत्त दिलं आहे. निवृत्त बुद्धिबळ रेफरी शोहरेह बयारत यांनी जानेवारी महिन्यात हे म्हटलं होतं की इराणच्या बुद्धिबळपटू किंवा इतर महिला खेळाडू जेव्हा स्पर्धांमध्ये भाग घेतात तेव्हा त्यांना हिजाब घालणं हे अनिवार्य आहे. हिजाब घातला नाही तर निषेध नोंदवला जातो, प्रसंगी कुटुंबालाही त्रास दिला जातो त्यांच्यावर हल्लाही केला जातो असं बयारत यांनी म्हटलं आहे.