इस्रायलकडून सीरियात विध्वंस; राजधानी दमास्कसजवळ बॉम्बवर्षाव, लष्करी तळ उद्ध्वस्त

पाठोपाठ इस्रायली सैन्याने देखील या हवाई हल्ल्याची माहिती दिली आहे. आयडीएफने (इस्रायली डिफेन्स फोर्सेस) म्हटलं आहे की “दक्षिण सीरियामध्ये काही सैन्य तळांवर आम्ही हल्ला केला आहे. यामध्ये कमांडर सेंटर व शस्त्रसाठा ठेवलेल्या काही जागांचा समावेश आहे. दक्षिण सीरियात लष्करी बळ वाढवण्यात आलं आहे. तसेच येथे काही दहशतवादी संघटना ठाण मांडून बसल्या होत्या. याचा इस्रायलला धोका होता. हा धोका दूर करण्यासाठी आम्हाला आक्रमक पाऊल उचलावं लागलं”.

दोन जण ठार

सीरिया टीव्हीने या हल्ल्याचं वृत्त जारी करताना म्हटलं आहे की इस्रायली विमानांनी दमास्कसपासून २० किलोमीटर दूर दक्षिण किस्वाह शहरावर हल्ला केला. यावेळी एका लष्करी तळावरही हवाई हल्ला करण्यात आला. या हल्ल्यात दोन जण ठार झाले आहेत. जखमींची संख्या अद्याप समोर आलेली नाही. हस्रायली वायूदलाने दमास्कसच्या आसपासच्या भागात लष्करी वाहनांना लक्ष्य केलं आहे. या हल्ल्यात मोठी वित्तहानी झाली आहे.

इस्रायलचे पंतप्रधान बिन्यामिन नेतान्याहू यांनी आधीच इशारा दिला होता

इस्रायलचे पंतप्रधान बिन्यामिन नेतान्याहू यांनी अलीकडेच म्हटलं होतं की “दक्षिण सीरियामध्ये एचटीएस किंवा इस्रायलविरोधात तयार होत असलेली कोणतीही शक्ती आम्ही टिकू देणार नाही. इस्रायलविरोधातील कारवाया थांबवण्याकडे आम्ही प्राधान्याने लक्ष देऊ. या भागात लष्करी तळ उभारू नयेत, अशी आमची मागणी आहे”.