“पुढील आव्हानासाठी तयार आहात? युद्धाचा पुढचा…”, इस्रायली पंतप्रधानांच्या सैनिकांना महत्त्वाच्या सूचना

याबाबतचा एक व्हिडीओ इस्रायलचे पंतप्रधान बेंजामिन नेतन्याहू यांनी ‘एक्स’ (पूर्वीचे ट्विटर) खात्यावरून शेअर केला आहे. ज्यामध्ये ते इस्रायल संरक्षण दलाच्या जवानांशी संवाद साधताना दिसत आहेत. संबंधित व्हिडीओ शेअर करताना इस्रायली पंतप्रधानांनी “आम्ही सर्व तयार आहोत” असं म्हटलं आहे.

हेही वाचा- इस्रायलने युद्धात पांढरा फॉस्फरस’ वापरल्यामुळे टीका का होतेय?

‘एक्स’वर शेअर केलेल्या व्हिडीओमध्ये इस्रायली पंतप्रधान बेंजामिन नेतन्याहू आपल्या जवानांना पुढील आव्हानासाठी तयार राहण्याविषयी सूचना देताना दिसत आहेत. “तुम्ही पुढील आव्हानासाठी तयार आहात का? युद्धाचा पुढचा टप्पा लवकरच येतोय,” असा संवाद बेंजामिन नेतन्याहू आपल्या सैनिकांशी करताना दिसत आहे. त्यामुळे युद्धाचा पुढील टप्पा नेमका काय असणार? यावरून तर्कवितर्क लढवले जात आहेत.

शनिवारी (७ ऑक्टोबर) हमासने ‘ऑपरेशन अल अक्सा फ्लड बॅटल’ची घोषणा करत इस्रायलवर हल्ला चढवला होता. याचा बदला म्हणून इस्रायलने ‘ऑपरेशन आयर्न स्वॉर्ड्स’ची घोषणा केली. हमास-इस्रायलच्या युद्धात दोन्ही देशातील ३२०० हून अधिक लोकांचा जीव गेला आहे. तर गाझा पट्टीत १९०० पॅलेस्टिनी लोकांचा मृत्यू झाला असून यामध्ये सुमारे ७०० लहान मुलं असल्याचं ‘युनिसेफ’ने म्हटलं आहे.