भारताची मंगळ मोहीम ऑक्टोबरमध्ये

मंगळावर जीवसृष्टीची शक्यता अजमावण्यासाठी भारतीय अंतरिक्ष संशोधन संस्थेने (इस्रो) महत्त्वाकांक्षी मोहीम आखली आहे. त्यासाठी साडेचारशे कोटी रुपयांचा खर्च अपेक्षित आहे. त्यासाठी वापरण्यात येणाऱ्या केवळ ‘पीएसएलव्ही- सी २५’ प्रक्षेपकासाठी एकशे दहा कोटी रुपये खर्च आला आहे.
कोठेही जीवसृष्टी अस्तित्वात येण्यासाठी मिथेन या वायूची गरज असते. तेव्हा जगाला आकर्षित करणाऱ्या मंगळावरही या मिथेनचे अस्तित्व तपासण्यासाठी इस्रोने विशेष ‘सेन्सर’ तयार केले आहेत. यांच्या मदतीने मंगळावर यापूर्वी जीवसृष्टी होती का किंवा भविष्यात तेथे जीवसृष्टी विकसित करणे शक्य आहे का, याचा उलगडा होणार आहे, असे ‘मार्स ऑर्बिटर मिशन’चे (एमओएम) प्रकल्प संचालक अरुणन् यांनी सांगितले.
ही मंगळ मोहीम येत्या २१ ऑक्टोबर रोजी सुरू करण्याचा इस्रोचा मानस आहे. मात्र, हवामानावर ते बरेचसे अवलंबून आहे, असे इस्रोच्या मंगळ मोहिमेचे संचालक एम. अण्णादुराई यांनी सांगितले. २१ ऑक्टोबर ते १९ नोव्हेंबर या कालावधीत ही मोहीम सिद्ध व्हावी अशी अपेक्षा आहे.