नेहरूंचा शांततामय सहजीवनाचा संदेश आजच्या स्थितीतही योग्यच- प्रणब मुखर्जी

पहिले पंतप्रधान नेहरू यांच्याबाबत अलीकडेच जी वक्तव्ये करण्यात आली त्याबाबत विचारले असता तेल अवीव ते नवी दिल्ली या विमानप्रवासात त्यांनी वार्ताहरांना सांगितले की, नेहरूंची काही तत्त्वे आजही तेवढीच योग्य आहेत; त्यात शांततामय सहजीवनाचेही तत्त्व आहे, त्याला कालमर्यादा नाही. आजच्या काळात नेहरूंची तत्त्वे सुसंगत आहेत काय, या प्रश्नावर ते उत्तर देत होते. धर्म हे देशाचे अधिष्ठान असता कामा नये, असे विधान मुखर्जी यांनी इस्रायलमध्ये केले होते; त्यावर विचारले असता ते म्हणाले की, धर्म देशाचे अधिष्ठान असता कामा नये. याचा अर्थ, समजा अरब देशांमध्ये इस्लाम धर्म आहे तर ते अरब देश धर्माच्या आधारावर एकत्र आलेले नाहीत. पाकिस्तान भारतातून १९४७ मध्ये वेगळा झाला, त्यानंतर पाकिस्तानातून २५ वर्षांतच बांगलादेश वेगळा निघाला. पॅलेस्टिनी दहशतवादाचा निषेध केला नाही म्हणून मुखर्जी यांच्यावर इस्रायलने टीका केली होती. त्यामुळे इस्रायल-पॅलेस्टाईन वादावर स्पष्ट भूमिका का मांडली नाहीत, या प्रश्नावर ते म्हणाले की, विविध देशांचे वेगवेगळे संबंध असतात.
दुसऱ्या देशाने त्यात प्रतिक्रिया द्यायची नसते त्यालाच आंतरराष्ट्रीय राजनीती म्हणतात. भारताचे २३ वर्षांपासून इस्रायलशी राजनैतिक संबंध आहेत व ती तात्त्विक भूमिका आहे, ती कायम आहे. आपण दोन्ही बाजूच्या नेत्यांशी बोललो, त्यात इस्रायली व पॅलेस्टिनी नेत्यांची या संघर्षांवर तोडगा काढण्याची इच्छा दिसून आली असे निरीक्षण त्यांनी मांडले.