राष्ट्रवादी काँग्रेसचे आमदार जितेंद्र आव्हाड यांनी तामिळनाडूचे मुख्यमंत्री एम के स्टॅलिन यांचं कौतुक केलं. तामिळनाडूच्या राज्यपालांनी विधानसभा अधिवेशनात कॅबिनेटने लिहून दिलेल्या भाषणातून थोर नेते रामास्वामी पेरियार आणि डॉ. बाबासाहेब आंबेडकरांचा उल्लेख टाळला. यावेळी एम के स्टॅलिन यांनी त्वरित मुद्दा उपस्थित करत राज्यपालांचा निषेध केला. या प्रकारानंतर राज्यपाल अधिवेशन सोडून निघून गेले.
या सर्व प्रकारानंतर जितेंद्र आव्हाड यांनी तामिळनाडूचे मुख्यमंत्री एम के स्टॅलिन यांच्यावर स्तुतीसुमने उधळली. नुकत्याच घेतलेल्या पत्रकार परिषदेत आव्हाड म्हणाले, “काल तामिळनाडूच्या विधानसभेत राज्यपालांनी कॅबिनेटने लिहून दिलेल्या भाषणामधून काही गोष्टी गाळल्या. तामिळनाडूत ज्यांना देवासमान मानलं जातं. ज्यांना तेथील समाजसुधारणेचं सूत्रधार मानलं जातं, अशा पेरियार रामास्वामी आणि डॉ. बाबासाहेब आंबेडकरांचं नाव घेण्याचं राज्यपालांनी मुद्दामहून टाळलं. यानंतर मुख्यमंत्री स्टॅलिन यांनी जागच्या जागी राज्यपालांचा निषेध केला. याचा राग आल्याने राज्यपाल विधानसभेच्या अधिवेशनाचं मैदान सोडून निघून गेले. पण मुख्यमंत्री स्टॅलिन यांनी राज्यपालांना थांबवण्याचा एकदाही प्रयत्न केला नाही, याचा मला अभिमान आहे,” असं विधान आव्हाड यांनी केलं.
आव्हाड पुढे म्हणाले, “महापुरुषांचा अपमान सहन करणार नाही, ही भारताची परंपरा आहे, या परंपरेला एम के स्टॅलिन जागले. तामिळनाडूत पेरियार रामास्वामी यांना देवासमान मानलं जातं. त्या पेरियार रामास्वामींचा अपमान झालाय… डॉ. बाबासाहेब आंबेडकरांचा अपमान झालाय. कॅबिनेटने लिहून दिलेल्या भाषणाचा निर्णय राज्यपालांनी स्वत: व्यासपीठावर गेल्यानंतर फिरवला. त्यावेळी मुख्यमंत्री स्टॅलिन ताठ मानेनं उभे राहिले आणि राज्यपालांचा निषेध केला. यानंतर राज्यपाल अधिवेशनातून निघून जात होते. पण स्टॅलिन यांनी राज्यपालांना अडवण्याचा एकदाही प्रयत्न केला नाही, त्यामुळे स्टॅलिन यांना माझा सलाम…,” अशा शब्दांत आव्हाडांनी एक स्टॅलिन यांचं कौतुक केलं.
