काश्मीरमध्ये दहशतवाद्यांच्या गोळीबारात चार जवान जखमी

दक्षिण काश्मीरमधील बिजभेरा गावात केंद्रीय राखीव पोलीस दलाच्या (सीआरपीएफ) जवानांवर दहशतवाद्यांनी केलेल्या गोळीबारात चार जवान सोमवारी सकाळी जखमी झाले. जखमी जवानांना रुग्णालयात दाखल करण्यात आले आहे. सीआरपीएफच्या जवानांकडून लगेचच दहशतवाद्यांना प्रत्युत्तर देण्यात आले.
बीजभेरा गावातून निघालेल्या सीआरपीएफ जवानांच्या गाडीवर दहशतवाद्यांनी अंदाधुंद गोळीबार करण्यास सुरुवात केली. त्यामध्ये चार जवान जखमी झाले. या हल्ल्यानंतर लगेचच इतर जवानांकडून प्रत्युत्तर देण्यात आले. गोळीबारानंतर लगेचच दहशतवादी आजूबाजूच्या परिसरात पळून गेले. या घटनेनंतर पोलीस आणि लष्कराच्या जवानांकडून परिसरात हल्लेखोरांचा शोध घेण्यात येत आहे. आतापर्यंत कोणत्याही दहशतवादी संघटनेने या हल्ल्याची जबाबदारी स्वीकारलेली नाही.