शपथ घेताच ज्योतीरादित्य शिंदेंच्या फेसबुकला अकाऊंटला शेअर झाला मोदी सरकारवरील टीकेचा व्हिडीओ

शपथ घेतल्यानंतर काही तासातच ज्योतीरादित्य शिंदे यांचं फेसबुक अकाऊंट हॅक झालं होतं. अकाऊंट हॅक केल्यानंतर हॅकर्सने एक व्हिडीओ शेअर केला होता ज्यामध्ये ज्योतीरादित्य शिंदे भाजपा आणि मोदी सरकारवर टीका करत आहेत. हा व्हिडीओ तेव्हाचा आहे जेव्हा ज्योतीरादित्य शिंदे काँग्रेसमध्ये होते.

Explained: मोदींच्या मंत्रिमंडळाचा मेगाविस्तार; ‘या’ १० गोष्टी जाणून घेणं महत्वाचं

व्हिडीओ पोस्ट झाल्यानंतर ज्योतीरादित्य शिंदे यांच्या सोशल मीडिया टीमने तात्काळ हा व्हिडीओ हटवला आणि अकाऊंट पुन्हा एकदा सुरळीत केलं.

माजी आमदार रमेश अग्रवाल यांनी केलेल्या तक्रारीनंतर गुरुवारी ग्वालियर पोलिसांनी याप्रकरणी तक्रार दाखल केली. पोलिसांनी माहिती तंत्रज्ञान कायद्यांतर्गत अज्ञातांविरोधात गुन्हा दाखल केला असून तपास सुरु आहे.

गतवर्षी मार्च महिन्यात ज्योतीरादित्य शिंदे यांनी काँग्रेसमधून भाजपात प्रवेश केल्यानंतर मध्य प्रदेशात भाजपाला सत्ता मिळवून दिली होती. त्यांच्यासोबच जवळपास दोन डझन आमदार भाजपात आले होते.

ज्योतीरादित्य यांनी काँग्रेसविरोधात बंड पुकारल्याने कमलनाथ सरकार १५ महिन्यात कोसळलं होतं. भाजपामध्ये प्रवेश केल्यानंतर ज्योतीरादित्य शिंदेंना राज्यसभा सदस्यत्व देण्यात आलं आणि शिवराज सिंग पुन्हा एकदा मध्य प्रदेशचे मुख्यमंत्री झाले.