अमेरिकेतील प्रचार अखेरच्या टप्प्यात, कमला हॅरिस लोकप्रिय टीव्ही कार्यक्रमात ; ट्रम्प यांचा उत्तर कॅरोलिनावर भर

अमेरिकेच्या अध्यक्षपदाच्या निवडणुकीसाठी मतदानाला अवघे दोन दिवस उरले असताना डेमोक्रॅटिक पक्षाच्या उमेदवार आणि विद्यामान उपाध्यक्ष कमला हॅरिस तसेच रिपब्लिकन पक्षाचे उमेदवार आणि माजी अध्यक्ष डोनाल्ड ट्रम्प यांचा अखेरच्या टप्प्यातील प्रचार सुरू आहे. हॅरिस यांनी ‘सॅटरडे नाइट लाइव्ह’ या लोकप्रिय दूरचिक्रवाणी कार्यक्रमात सहभाग घेतला तर ट्रम्प यांनी उत्तर कॅरोलिना राज्यावर लक्ष केंद्रित केले आहे.

‘सॅटरडे नाइट लाइव्ह’ कार्यक्रमात निवेदिका माया रडॉल्फ यांच्यासारखीच वेशभूषा करून त्यांच्या आरशातील प्रतिमेप्रमाणे भासणाऱ्या कमला हॅरिस यांचे या कार्यक्रमात सहभागी होणे त्यांच्या चाहते आणि समर्थकांसाठी आश्चर्याचा धक्का होता. सुरुवातीलाच निवेदिका रडॉल्फ यांना उद्देशून ‘तुला भेटून आनंद झाला कमला,’ असे मिश्किल उद्गार त्यांनी काढले आणि प्रेक्षकांकडून जोरदार प्रतिसाद मिळाला. या प्रतिसादामुळे त्यांची ही खेळी सफल होत असल्याचे मानले जात आहे.