मी राजकारणी नाही, विद्यार्थीच!

नितीश कुमारांचा पाठिंबा
बिहारचे मुख्यमंत्री नितीश कुमार यांनी कन्हैया कुमार याला पाठिंबा व्यक्त केला आहे. कन्हैयाने गरिबी आणि असहिष्णुतेपासून स्वातंत्र्य मिळवण्याची जी भूमिका मांडली आहे तिला आपला पाठिंबा असल्याचे ते म्हणाले. तसेच कन्हैयासारखा हुशार मुलगा राष्ट्रद्रोहाचे आरोप करणाऱ्यांपेक्षा अधिक राष्ट्रवादी आहे, असेही ते म्हणाले.

नायडू यांची टीका
कन्हैया कुमार याला फुकटची प्रसिद्धी मिळत आहे, असे मत केंद्रीय मंत्री व्यंकय्या नायडू यांनी व्यक्त केले. विद्यार्थ्यांनी शिकावे आंदोलने आणि राजकारण करू नये, असे १९७३मध्ये ‘अभाविप’चा नेता म्हणून कारकीर्द सुरू केलेल्या नायडू यांनी सांगितले.

राजनाथ यांचे स्पष्टीकरण
जेएनयूप्रकरणी दिल्ली पोलिसांना जे काही करायचे आहे ते ते करत आहेत. माझा त्याच्याशी काही संबंध नाही, असे म्हणत केंद्रीय गृहमंत्री राजनाथ सिंग यांनी आपले हात वर केले आहेत.

कन्हैयाच्या भाषणातील मुद्दे
* मोदीजी स्टॅलिन आणि क्रुश्चेव्हबद्दल बोलत होते. मला वाटलं की टीव्हीत घुसावं आणि म्हणावं, मोदीजी थोडं हिटलरबद्दलही बोला ना! निदान मुसोलिनीबद्दल बोला, ज्यांच्यासारखी काळी टोपी तुम्ही घालता!
* भाजपच्या एका खासदारानं सांगितलं की, सीमेवर सैनिक धारातीर्थी पडत आहेत. मी त्यांना विचारतो, तुमचा भाऊ तिथे आहे का? पण आमचे अनेक बांधव सीमेवर आहेत, अनेक शेतकरी बांधव आत्महत्या करीत आहेत.
* मी सैनिकांना सलामच करतो, पण त्यांच्या कुटुंबियांचा विचार तुम्ही कधी केलात का शेतकऱ्यांच्या कुटुंबांचा विचार कधी केलात का?
* रोहित वेमुलाच्या न्यायासाठी सुरू झालेल्या लढय़ाकडून लक्ष वळविण्यासाठी आणि विद्यापीठ अनुदान आयोगावर कब्जा करण्यासाठी जेएनयूतला प्रकार घडवला गेला. मी पूर्वी हे उघड केलं नाही, पण माझं कुटुंब दरमहा केवळ तीन हजार रुपये कमावतात. केवळ जेएनयूमुळे मी पीएच.डी करू शकत आहे.