Video: छेड काढणाऱ्याला तरुणीनं स्वत:च घडवली अद्दल, भर बाजारात १३ वेळा श्रीमुखात भडकावली; विकृत गयावया करू लागला!

नेमकं काय घडलं?

हा सगळा प्रकार कानपूरच्या बेकनगंज मार्केटमधला असल्याचं फ्री प्रेस जर्नलनं दिलेल्या वृत्तात म्हटलं आहे. सदर तरुणी बाजारात खरेदीसाठी आली असता संबंधित विकृत तरुण वारंवार तिच्या जवळ जाण्याचा, तिला स्पर्श करण्याचा प्रयत्न करत होता. असं करताना हा तरूण या तरुणीला उद्देशून अश्लील शेरेबाजीही करत होता. आधी या तरुणीनं त्याच्याकडे दुर्लक्ष केलं. पण नंतर हे प्रकरण अती होत असल्याचं पाहून तरुणीनं उलट फिरून या विकृताला जाब विचारायला सुरुवात केली.

या ‘प्रश्नोत्तरात’ही तरुण उडवाउडवी करत असल्याचं पाहून तरुणीचा पारा चांगलाच चढला. मग तरुणीनं या विकृताचा शर्ट डाव्या हाताने पकडून त्याच्या कानशि‍लात लगावायला सुरुवात केली. हा गोंधळ पाहून आसपासचे लोकही तरुणाला बोलू लागले. एका व्यक्तीनं हा सगळा प्रकार व्हिडीओमध्ये कैद केला. या व्हिडीओत सदर तरुणी विकृताला कानशि‍लात लगावत असल्याचं दिसत आहे. अवघ्या मिनीटभराच्या वेळात तरुणीनं या विकृताला तब्बल १३ वेळा कानशि‍लात लगावल्याचं व्हायरल व्हिडीओत दिसत आहे.

विकृताच्या गयावया, तरुणीचा संताप

शेवटी तरुणीच्या हातचे फटके टाळण्यासाठी हा विकृत उपस्थितांकडे गयावया करू लागला. पण कुणीही त्याला सोडवण्यासाठी पुढे आलं नाही. “मला वाचवा, मी परत असं करणार नाही”, असं हा विकृत म्हणताना दिसत आहे. पण तरुणीनं त्याला मारणं चालूच ठेवल्यामुळे शेवटी तो खाली पडला. व्हिडीओ शूट करणाऱ्या व्यक्तीनेही “तू नेहमीच इतरांना त्रास देतोस, इथे सगळ्यांना तुझा वैताग आला आहे”, असं म्हटल्याचं व्हिडीओच ऐकू येत आहे.

पोलिसांची कारवाई

दरम्यान, हा व्हिडीओ व्हायरल झाल्यानंतर पोलिसांनी त्याची दखल घेत संबंधित विकृताला अटक केली आहे. कानपूर पोलिसांनी त्यांच्या अधिकृत एक्स हँडलवर यासंदर्भातली माहिती देणारा व्हिडीओही शेअर केला आहे.

एकीकडे काही महिला अशा विकृतांच्या शोषणाच्या बळी पडत असताना काही महिला मात्र अशा विकृतांना अद्दल घडवण्यासाठी स्वत: पुढे सरसावत असून स्वसंरक्षणाचा आदर्श घालून देत असल्याच्या प्रतिक्रिया व्यक्त होत आहेत.