कर्नाटकात राजकीयनाट्य सुरू; मुख्यमंत्री कुमारस्वामींचा दिल्ली दौरा रद्द

मतदानादरम्यान ईव्हीएममध्ये गडबड झाल्याच्या मुद्यावर आज (मंगळवार) विरोधी पक्षांचे नेते निवडणूक आयोगाबरोबर बैठक करणार आहेत. ज्यासाठी मुख्यमंत्री कुमारस्वामी दिल्लीला जाणार होते. मात्र, कर्नाटकातील बिघडलेली राजकीय परिस्थिती पाहता त्यांनी बंगळुरात राहणेच पसंत केल्याचे दिसत आहे. तर, कर्नाटकात काही सत्ताधारी नेत्यांकडूनच बंडखोरी होण्याची शक्यता वर्तवली जात आहे.

मुख्यमंत्री कुमारस्वामी आज सायंकाळी काँग्रेस महासचिव व कर्नाटकचे काँग्रेस प्रभारी के.सी वेणुगोपाल यांची भेट घेणार आहेत. एका एक्झिट पोलनुसार कर्नाटकात भाजपाला २८ जागांपैकी २१ ते २५ जागा मिळणार असल्याचे दाखवण्यात आले आहे. तर, काँग्रेस व जनता दल (धर्मनिरपेक्ष) यांच्या पदरात केवळ ३ ते ६ जागा येणार असल्याचे सांगण्यात आले आहे. पाहणीनुसार राज्यात भाजपाला ४९ टक्के मत मिळतील. व काँग्रेस व जनता दल (धर्मनिरपेक्ष) यांना ४३ टक्के मत मिळण्याची शक्यता आहे.