झाकीर हुसैन ट्रस्टमध्ये झालेल्या ७१ लाखांच्या घोटाळ्यात विधी व न्यायमंत्री सलमान खुर्शीद यांची केंद्रीय मंत्रिमंडळातून हकालपट्टी होईपर्यंत संसद मार्गावर धरणे देण्याचा निर्धार चार दिवसांत गुंडाळून अरविंद केजरीवाल यांनी आपले आंदोलन थांबविले आहे. आता खुर्शीद यांचा लोकसभा मतदारसंघ फारुखाबाद येथे १ नोव्हेंबरपासून आंदोलन छेडण्याची नवी घोषणा त्यांनी केली आहे. दरम्यान, या वादाच्या पाश्र्वभूमीवर खुर्शीद मंत्रीपदाचा राजीनामा देणार नाहीत, हे आता स्पष्ट झाले आहे.
खुर्शीद अध्यक्ष असलेल्या झाकीर हुसैन ट्रस्टमध्ये अपंगांना कर्णयंत्र व यांत्रिक उपकरणे देण्याच्या बाबतीत ७१ लाख रुपयांचा घोटाळा झाल्याचा आरोप इंडिया टुडे समूहाने केला आहे. खुर्शीद यांनी रविवारी ब्रिटनहून परतल्यानंतर या आरोपांचे पुराव्यांनिशी खंडन केले. इंडिया टुडे समूहाविरुद्ध मुंबई उच्च न्यायालयात खुर्शीद २०० कोटी रुपयांचा मानहानीचा दावा ठोकणार आहेत. खुर्शीद यांनी इंडिया टुडे समूहाविरुद्ध लंडनमध्येही ५० लाख पौंडांचा दावा ठोकण्याचे ठरविले आहे. एवढेच नव्हे तर दिल्लीच्या न्यायालयातही ७१ लाख रुपयांचा मानहानीचा खटला दाखल करण्यात येत आहे. भ्रष्टाचार प्रकरणी यापूर्वी शशी थरूर आणि अशोक चव्हाण यांचे आरोप सिद्ध होण्यापूर्वीच राजीनामे घेणाऱ्या काँग्रेसने आपली रणनीती बदलली आहे. हवेत होणाऱ्या आरोपांची दखल घेऊन आपले मोहरे गमावण्यात काहीच हशील नाही, असा निष्कर्ष काढून सलमान खुर्शीद यांचे समर्थन करण्याचे काँग्रेसने ठरविले आहे. खुर्शीद यांच्यावर आरोप सिद्ध झाले नसताना त्यांचा राजीनामा घ्यायचा नाही, अशा निर्णयाप्रत काँग्रेसश्रेष्ठी पोहोचले आहेत. खुर्शीद यांचा राजीनामा घेतल्यावर रॉबर्ट वढेरा यांचे प्रकरण पुन्हा डोके वर काढेल, अशीही भीती काँग्रेसला आहे.
गडकरींविरुद्धचा गौप्यस्फोट आता बुधवारी?
केजरीवाल आणि त्यांच्या इंडिया अगेन्स्ट करप्शनच्या सहकारी अंजली दमानिया यांची उद्या सायंकाळी भाजपचे राष्ट्रीय अध्यक्ष नितीन गडकरी यांच्या भ्रष्टाचाराविरुद्ध होणारी पत्रकार परिषदही एक दिवसासाठी स्थगित करण्यात आली आहे. बुधवारी, १७ ऑक्टोबर रोजी आपण एका बडय़ा नेत्याच्या भ्रष्टाचाराचा गौप्यस्फोट करणार असल्याचे केजरीवाल यांनी जाहीर केले. पण हा नेता कोण हे सांगण्याचे टाळले. केजरीवाल यांनी नव्या गौप्यस्फोटासाठी १० ऑक्टोबरची तारीख निश्चित केली होती. पण त्यांनी नंतर हा मुहूर्त १६ ऑक्टोबपर्यंत पुढे ढकलला. १७ ऑक्टोबरच्या मुहूर्तावर ते ठाम राहतात काय, याची प्रतीक्षा आहे.
७१ लाख म्हणजे किरकोळ रक्कम’
अरविंद केजरीवाल यांनी केंद्रीय कायदामंत्री सलमान खुर्शीद यांच्यावर केलेल्या आरोपांवर टीका करतानाच केंद्रीय पोलादमंत्री बेनीप्रसाद वर्मा यांनी सोमवारी नवा वाद निर्माण केला. ‘७१ लाख ही एखाद्या केंद्रीय मंत्र्यासाठी अतिशय किरकोळ रक्कम आहे,’ असे सांगत वर्मा यांनी खुर्शीद यांचा बचाव केला. मात्र, त्यांच्या या विधानाने नवे वादंग निर्माण झाले आहे. सलमान खुर्शीद यांच्या झाकीर हुसैन ट्रस्टने ७१ लाखांचा घोटाळा केल्याचा आरोप केजरीवाल यांनी केला होता. त्यावर प्रतिक्रिया देताना वर्मा म्हणाले,‘खुर्शीद हे जबाबदार व्यक्ती आहेत. ते जेव्हा म्हणतात की यात काही घोटाळा नाही, तेव्हा त्यांच्यावर विश्वास ठेवला पाहिजे.’
