जादूटोण्याच्या संशयातून पाच वर्षांत संपूर्ण कुटुंब संपवलं; जामीनावर बाहेर आलेल्या आरोपीचं कृत्य

त्या दोघी सोडून संपूर्ण कुटुंब संपलं

सुधाकरण, त्यांची पत्नी आणि आईचा खून झाला असला तरी त्यांची दुसरी पत्नी आणि दोन मुली मात्र सुखरुप वाचल्या आहेत. खून होण्याआधी या तिघी बाजारात गेल्यामुळे त्या वाचल्या. आता वडील आणि आजीला गमावल्यामुळे दोन्ही मुली अतिशय दुःखात आहेत. सुधाकरण यांच्या दोन्ही मुलींनी आईचा खून झाल्यानंतर चेंथामारा यांना त्यांच्या शेजारी राहण्याची परवानगी देऊ नये, अशी मागणी केली होती. मात्र पोलिसांनी याची दखल घेतली नाही. त्यानंतर सोमवारी (२७ जानेवारी) जामीनावर बाहेर आलेल्या आरोपीने सुधाकरण यांचा आणि आईचा खून केला.

अखिला आणि अतुल्या या सुधाकरण यांच्या दोन्ही मुलींनी आरोपीला आता फाशी द्यावी, अशी मागणी केली आहे. त्याने २०१९ साली आमच्या आईचा खून केला आणि आता आमच्या बाबांना, आजींनाही मारले. त्याला आता पुन्हा तुरुंगातून जामीन मिळाला तर तो असाच लोकांना मारत राहिल.

पोलिसांनी सांगितले की, चेंथामाराने आपला गुन्हा कबूल केला आहे. सुधाकरणनेच त्याच्यावर हल्ला केल्याचा आरोप चेंथामाराने केला आहे. त्याच्या पत्नीच्या खूनाचा बदला घेण्यासाठी सुधाकरणने माझ्यावर हल्ला केला, असा दावा आरोपीने केला. २०१९ च्या आधी चेंथामाराची बायको त्याला सोडून गेली होती. सुधाकरणच्या कुटुंबियांनी जादूटोणा केल्यामुळेच पत्नी सोडून गेली, असा चेंथामाराचा संशय होता. त्यामुळे त्याने सुधाकरणच्या पत्नीचा खून केला होता. आता पाच वर्षांनंतर त्याने सुधाकरण आणि त्याच्या आईलाही संपविले.