Kolkata RG Kar Doctor Case : “मला गोवण्यात आलं, पण यात एका आयपीएसचा…”, न्यायालयाने दोषी ठरवल्यानंतर आरोपी संजय रॉय काय म्हणाला?

दरम्यान, आरजी.कर रुग्णालयातील एका महिला डॉक्टरवर बलात्कार करून हत्या केल्याच्या प्रकरणात मुख्य आरोपी संजय रॉय याला दोषी ठरवल्यानंतर संजय रॉयने आपण निर्दोष असल्याचं म्हटलं आहे. “मला या प्रकरणात गोवण्यात आलं आहे. मात्र, मी निर्दोष आहे, या प्रकरणात एका आयपीएस अधिकाऱ्याचा हात आहे”, असा आरोप आरोपी संजय रॉयने केला आहे. यासंदर्भातील वृत्त एएनआयच्या हवाल्याने हिंदुस्तान टाईम्सने दिलं आहे.

संजय रॉयने नेमकं काय म्हटलं?

रिपोर्टनुसार, आरोपी संजय रॉयने म्हटलं की, “मी असं काहीही केलेलं नाही. मला यात गोवण्यात आलं. मात्र, ज्यांनी हे कृत्य केलं त्यांना सोडून दिलं जात आहे. यामध्ये एका आयपीएस अधिकाऱ्याचा समावेश आहे. मी नेहमी गळ्यात रुद्राक्षाची माळ घालतो. मी गुन्हा केला असता तर घटनास्थळी माझ्या गळ्यातील माळ तुटली असती. मी हा गुन्हा करू शकत नाही”, असं संजय रॉयने म्हटलं आहे. दरम्यान, आज सियालदह सत्र न्यायालयाने आरोपीला दोषी ठरवल्यानंतर आरोपी संजय रॉयची कोठडीत रवानगी करण्यात आली. आता सोमवारी शिक्षा सुनावण्यात येणार आहे. तसेच या खटल्याच्या सुनावणीसाठी दुपारी १२.३० वाजताची वेळ निश्चित करण्यात आलेली आहे.

नेमकं प्रकरण काय?

कोलकाता येथील आर.जी.कर वैद्यकीय महाविद्यालय आणि रुग्णालयात ९ ऑगस्ट रोजी सकाळी एक महिला डॉक्टर सेमिनार हॉलमध्ये मृतावस्थेत आढळली होती. त्यावेळी तिचा मृतदेह अर्धनग्न अवस्थेत आढळून आला होता. तिच्या मृतदेहाचे शवविच्छेदन करण्यात आल्यानंतर तिच्यावर बलात्कार झाल्याचे समोर आले होते. तिच्या शरीरावर आणि गुप्तांगावर अनेक जखमा होत्या. आरोपीने या डॉक्टरवर आधी बलात्कार केला आणि त्यानंतर अत्यंत क्रूरपणे तिची हत्या केली. तसेच मृतदेहाची विटंबना केली होती. हे प्रकरण समोर आल्यानंतर देशभरात संतापाची लाट उसळली होती.