POLL: ५८ टक्के लोकं म्हणतात, ‘होय, CBI अधिकाऱ्यांची बदली राफेलला घाबरूनच’

सध्या देशभरात गाजत असलेल्या सीबीआय प्रकरणावरून राहुल गांधीनी मोदी सरकारवर केलेला आरोप योग्य वाटतो का असा सवाल केला होता. फेसबुक तसेच ट्विटवरील या जनमत चाचणीमध्ये, ‘‘राफेल’च्या भीतीमुळे नरेंद्र मोदींनी सीबीआय अधिकाऱ्यांना हटवले, हा राहुल गांधींचा आरोप पटतो का?’ हा प्रश्न वाचकांना विचारण्यात आला. यासाठी ‘होय’ आम्ही राहुल गांधीशी सहमत आहोत आणि ‘नाही’ आम्ही राहुल गांधींशी सहमत नाही असे दोन पर्याय देण्यात आले होते.

फेसबुकवर एकूण दोन हजार ७०० हून अधिक लोकांनी जनमत चाचणीत आपले मत नोंदवले. त्यापैकी एक हजार ६०० हून अधिक जणांनी म्हणजेच ५८ टक्के वाचकांनी आपण राहुल गांधींच्या मताशी सहमत असून राफेलच्या भीतीमुळेच नरेंद्र मोदींनी सीबीआयच्या अधिकाऱ्यांना हटवल्याचे मत नोंदवले. तर ४२ टक्के लोकांनी म्हणजेच एक हजार १०० हून अधिक जणांनी नाही असे मत नोंदवत मोदींनी राफेलला घाबरून सीबीआय अधिकाऱ्यांची बदली केली नाही असे मत नोंदवले.

तर ट्विटवरही ३८५ जणांनी या जनमत चाचणीमध्ये आपले मत नोंदवले. त्यापैकी ५८ टक्के वाचकांनी राहुल गांधींचे मत पटत असल्याचे मत मांडले तर ४२ टक्के वाचकांनी या मताशी असहमत असल्याचे सांगितले आहे.

काही दिवसांपूर्वी राहुल यांनी ट्विटरद्वारेही मोदींवर निशाणा साधला होता. सीबीआयचे संचालक आलोक वर्मा हे राफेल घोटाळ्याबाबतचे कागदपत्र गोळा करत होते. मात्र, त्यांना बळजबरी सक्तीच्या रजेवर पाठवण्यात आलं. जो कोणी राफेल घोटाळ्याबाबत चौकशी करण्याचा प्रयत्न करेल त्याला हटवलं जाईल, संपवलं जाईल असा थेट संदेश मोदींनी दिला आहे. देश आणि देशाची राज्यघटना संकटात आहे. असा गंभीर आरोप राहुल गांधींनी केला आहे.