फ्रिजमध्ये बीफ ठेवल्याचा आरोप, मध्य प्रदेशात ११ घरांवर बुलडोझर; आधीच नोटीस दिल्याचा प्रशासनाचा दावा!

ही सगळी घरं सरकारी भूखंडावर होती. पोलिसांनी या प्रकरणी ११ लोकांविरोधात गुन्हे दाखल केले आहेत. शनिवारी संध्याकाळी नैनपूरमधील भैन्सवाही गावात ही घटना घडली. या घरांवर छापा टाकणाऱ्या पोलीस पथकाने ११ आरोपींपैकी एकाला अटकही केली आहे. वाहिद कुरेशी असं या आरोपीचं नाव असून त्याची न्यायालयीन कोठडीत रवानही करण्यात आली आहे. आरोपींपैकी ५ ते ६ आरोपींचा याआधीही गाय तस्करी प्रकरणात सहभाग आढळून आल्याचं पोलिसांचं म्हणणं आहे.

चराईच्या भूखंडावर होती घरं!

मांडलाचे पोलीस अधीक्षक रजत सकलेचा यांनी इंडियन एक्स्प्रेसला दिलेल्या माहितीनुसार, हा १५००० चौरस फुटांचा भूखंड चराई क्षेत्र म्हणून स्थानिक प्रशासनाने जाहीर केला होता. त्यावर ही घरं बांदण्यात आली होती. काही दिवसांपूर्वी स्थानिक प्रशासनाने या अतिक्रमणासंदर्भात या घरांना नोटिसाही पाठवल्या होत्या. त्यामुळे आदेश मिळाल्यानंतर स्थानिक प्रशासनाने या घरांवर कारवाई केली.

दंगलींबाबत शाळांमध्ये शिकविण्याची गरज नाही – एनसीईआरटी

दरम्यान, गाय तस्करीबाबतही सकलेचा यांनी माहिती दिली. “या गावात याआधीही गाय तस्करीची ५ ते ६ प्रकरणं समोर आली होती. त्यामुळे पोलिसांची गस्त वाढवण्यात आली होती. यावेळी आम्हाला माहिती मिळताच तीन पथकांनिशी आम्ही कारवाई केली. त्यांनी टाकलेल्या छाप्यात या घरांमधील फ्रीजमधून बीफ ताब्यात घेण्यात आलं आहे. त्याशिवाय जवळपास १०० जनावरं, जनावरांची हाडं तिथे सापडली. त्याशिवाय जवळपास १५० गायीदेखील ताब्यात घेण्यात आल्या आहेत”, असं ते म्हणाले.

मांडला ते जबलपूर..गाय तस्करीचं रॅकेट

मध्य प्रदेशातील मांडला ते जबलपूर या भागात हे गाय तस्करीचं रॅकेट असल्याचं पोलिसांनी सांगितलं. “या प्रकरणातील मुख्य आरोपीचा एक नातेवाईक मोठा व्यावसायिक असून तो जबलपूरला राहतो. जनावरांची हाडं सप्लिमेंट तयार करण्यासाठी वापरण्यात येणार होती, तर त्यातलं मांस इतर उत्पादनांसाठी वापरलं जाणार होतं”, अशी माहिती एका वरीष्ठ अधिकाऱ्यानं सांगितली.