बलात्काऱ्यांना सार्वजिनकपणे फासावर लटकवलं पाहिजे, जेणेकरुन इतरांपर्यंत संदेश जाईल आणि कोणीही असा गुन्हा करण्याचा विचार करणार नाही असं विधान मध्य प्रदेशातील भाजपा नेत्या उषा ठाकूर यांनी केलं आहे. खांडवा जिल्ह्यात एका चार वर्षाच्या मुलीवर बलात्कार करण्यात आला असून त्याच पार्श्वभूमीवर उषा ठाकूर यांनी हे वक्तव्य केलं आहे.
“मध्य प्रदेश सरकार अशा क्रूर घटकांचा कठोरपणे सामना करत आहे. बलात्काऱ्यांना फाशीची तरतूद असणारं हे पहिलं राज्य आहे. आतापर्यंत अशा ७२ गुन्हेगारांना फाशीची शिक्षा देण्यात आली आहे,” अशी माहिती पर्यावरण आणि सांस्कृतिक मंत्री उषा ठाकूर यांनी प्रसारमाध्यमांशी बोलताना दिली.
पण तरीही अशा प्रकारच्या घटना वारंवार होत असतील तर मग हा आपल्या सर्वांसाठी चिंतेचा विषय आहे अशी नाराजी त्यांनी व्यक्त केली. “आपल्याला विविध माध्यमातून समाजाचं प्रबोधन करायचं आहे. पण कोणीही अशा प्रकारची घृण कृत्य कसं काय करु शकतं? मी मुख्यमंत्री शिवराज सिंग चौहान यांच्याकडे अशा गुन्हेदारांना भरचौकात फाशी द्यावी अशी विनंती करणार आहे. आरोपीला जेलमध्ये फाशीची शिक्षा दिली जाते, पण ती कुठे दिली जाते हे कोणालाच माहिती नसतं,” असं त्यांनी म्हटलं.
”जर नुकत्याच झालेल्या बलात्कार प्रकरणांमधील दोन आरोपींना सार्वजनिकपणे फासावर लटकवलं तर इतर कोणीही असा गुन्हा विचार करताना हजार वेळा विचार करेल,” असं उषा ठाकूर म्हणाल्या आहेत. खांडवा येथे एका चार वर्षांच्या चिमुरडीवर बलात्कार करण्यात आला आहे. सोमवारी बेशुद्ध अवस्थेत ती शेतात आढळली होती. तिच्यावर सध्या रुग्णालयात उपचार सुरु आहेत.
