Mahakumbh 2025 Highlights : “हिंदू जनता विधानसभा निवडणुकीत ममता बॅनर्जींना धडा शिकवेल”, कुंभमेळ्याबद्दलच्या वक्तव्यावरून भाजपा नेत्याची टीका

पश्चिम बंगालच्या मुख्यमंत्री ममता बॅनर्जी यांनी प्रयागराज येथील कुंभमेळ्याचा उल्लेख रक्त कुंभ असा केला होता. यावर पश्चिम बंगालचे भाजपाचे दिग्गज नेते सुवेंदू अधिकारी यांनी टीका केली आहे. हा वाईट शब्द आहे, हे आम्हाला मान्य नाही. ६० कोटींहून अधिक लोकांनी येथे स्नान केले आहे. सफाई कर्मचारी ते पोलीस कर्मचारी काम करत आहेत. हे सगळं पंतप्रधान मोदींचे मार्गदर्शन आणि योगी आदित्यनाथ यांच्या नेतृत्वामुळे शक्य झाले. महाकुंभचा अपमान जनता सहन करणार नाही. हिंदू जनता विधानसभा निवडणूकीत (बंगालच्या) चांगल्या पद्धतीने ममता बॅनर्जी यांना धडा शिकवेल,” असे भाजपा नेते अधिकारी प्रयागराज येथे बोलताना म्हणाले.

“एक हिंदू म्हणून, एक सनातनी म्हणून आणि भारतमातेचा पुत्र म्हणून, ही माझी अमृत प्राप्ती आहे. म्हणूनच ही भूमी आणि संगम ‘अमृत संगम’ आहे. भारताचे पंतप्रधान नरेंद्र मोदी आणि उत्तर प्रदेशचे मुख्यमंत्री योगी आदित्यनाथ यांच्यामुळे हे शक्य झाले…,” अशी प्रतिक्रिया पश्चिम बंगालचे विधानसभेतील विरोधीपक्षनेते सुवेंदू अधिकारी यांनी प्रयागराज येथे महाकुंभमेळ्यात सहभागी झाल्यानंतर दिली.

प्रयागराज येथील महाकुंभमेळा महाशिवरात्रीच्या दिवशी समाप्त होईल. यावर्षी महाशिवरात्री २६ फेब्रुवारी २०२५ रोजी आहे. याच दिवशी अखेरचे शाही स्नान होईल.

केंद्रीय जलशक्ती मंत्री सीआर पाटील यांनी त्यांच्या कुटुंबासह प्रयागराजमधील महाकुंभ दरम्यान त्रिवेणी संगमात पवित्र स्नान आणि प्रार्थना केली.

कुंभमेळ्यादरम्यान संगमात स्नान करणे हे एक सौभाग्य आहे. ही संधी दिल्याबद्दल परमेश्वराचे खूप खूप आभार. कुंभमेळ्याचे खूप यशस्वीरित्या आयोजन करण्यात आले. मी उत्तर प्रदेशचे मुख्यमंत्री योगी आदित्यनाथ आणि युपी प्रशासनाचे आभार मानतो.

प्रयागराजला भाविकांना घेऊन जाणाऱ्या गाडीला वाराणसीतील मिर्झामुरादजवळ जीटी रोडवर उभ्या असलेल्या ट्रकला धडक दिल्याने सहा जणांचा मृत्यू झाला आहे. तर या दुर्घटनेत पाच जण गंभीर जखमी झाले . मिर्झामुराद पोलीस स्टेशनचे एसएचओ अजय राज वर्मा यांनी सांगितले की, हे सर्व भाविक कर्नाटकचे होते. पीटीआयने यासंबंधीचे वृत्त दिले आहे.