श्रद्धा वालकर हत्याकांडाची पुनरावृत्ती! विवाहित व्यक्तीकडून लिव्ह-इन पार्टनरची हत्या, ८ महिने मृतदेह फ्रिजमध्ये

पोलीस अधीक्षक पुनीत गेहलोत यांनी सांगितले की, मृतदेह आढळल्यानंतर काही तासातच आम्ही संजय पाटीदारला अटक केली. स्थानिक लोकांनी दिलेल्या माहितीनुसार प्रतिभा मागच्या वर्षी मार्च महिन्यानंतर दिसली नव्हती. तर संजय पाटीदार जून २०२४ मध्येच भाड्याचे घर सोडून निघून गेला होता. संजय पाटीदारने पोलिसांना सांगितले की, तो पाच वर्षांपासून प्रतिभाबरोबर लिव्ह इन रिलेशनशिपमध्ये राहत होता.

२०२३ साली संजय आणि प्रतिभा देवास येथे आले होते. दे दोघेही विवाहित आहेत, असे ते लोकांना सांगत असत. जानेवारी २०२४ मध्ये दोघांमध्ये खटके उडायला लागले. प्रतिभाने लग्न कराण्यासाठी संजयमागे तगादा लावला होता. ज्यामुळे संजय संतापला आणि त्याने या कारणावरून प्रतिभाशी वाद घालायला सुरुवात केली. मार्च २०२४ मध्ये संजयने त्याचा मित्र विनोद दवेसह मिळून प्रतिभाला मारण्याचा कट रचला. दोघांनी मिळून प्रतिभाचा गळा दाबून तिचा खून केला. त्यानंतर हात-पाय बांधून मृतदेह फ्रिजमध्ये ठेवला.

मृतदेह फ्रिजमध्ये ठेवल्यानंतर आरोपी संजय पाटीदारने भाड्याचे घर सोडले. मात्र आपले सामान इथेच ठेवू देण्यासाठी घरातील एक खोली स्वतःकडेच ठेवण्याची विनंती मालक धीरेंद्र श्रीवास्तव यांच्याकडे केली. पोलीस अधीक्षकांनी सांगितले की, संजय अधून-मधून घरी येत जात होता. अलीकडेच श्रीवास्तव यांनी हे घर बलवीर राजपूत नामक व्यक्तीला भाड्याने दिले. यावेळी राजपूत यांनी संजय पाटीदारची बंद असलेली खोली पाहण्याची विनंती केली. ही खोली दाखविल्यानंतर त्या खोलीतील फ्रिजचे कनेक्शन सुरू असल्याचे त्यांच्या लक्षात आले. त्यानंतर त्यांनी फ्रिज बंद केला. ज्यामुळे दोन दिवसानंतर त्यातून दुर्गंधी येण्यास सुरुवात झाली.

आरोपी संजय पाटीदार हा विवाहित असून त्याला दोन मुले आहेत.