Video: “त्यांनी माझ्या बहिणींना विकले असते…”, चार बहिणी, आईची हत्या करणाऱ्या अर्शदचा धक्कादायक व्हिडीओ समोर

अर्शदचा एक व्हिडीओ आता समोर आला आहे. ज्यामध्ये त्याने बदायूँ येथील त्याचे घर जमीन माफियांनी हडप केल्याचे म्हटले आहे. जमीन माफिया माझ्या बहिणींना विकणार होते, असा दावा त्याने केला आहे. या घटनेची माहिती मिळताच पोलिसांनी घटनास्थळी धाव घेतली. मृतांमध्ये ४९ वर्षीय आई अस्मान, मुलगी अलिशिया (१९), रहमीन (१८), अक्ष (१६) आणि आलिया (९) या चार मुली आहेत. पोलिसांनी आरोपी अर्शदला ताब्यात घेतले असून पुढील चौकशी सुरू आहे.

हे वाचा >> Lucknow Crime : धक्कादायक! लखनऊ हत्याकांडाने हादरलं; चार बहिणीसह आईची हत्या, मुलाला अटक तर वडील फरार

व्हिडीओमध्ये अर्शदने काय म्हटले?

खून केल्यानंतर अर्शदने व्हिडीओ रेकॉर्ड करून यामागचे कारण सांगितले आहे. अर्शद म्हणाला, “आमच्या शेजाऱ्यांच्या छळाला कंटाळून आम्हाला हे पाऊल उचलावे लागले. मी आई आणि बहिणींची हत्या केली. पोलिसांना जेव्हा हा व्हिडीओ प्राप्त होईल, तेव्हा त्यांनी आम्हाला त्रास देणाऱ्यांचा शोध घ्यावा. आमचे घर हडपले. आम्ही आवाज उचलला पण कुणीही आमची मदत केली नाही. मागच्या १५ दिवसांपासून माझे कुटुंबिय रस्त्यावर थंडीत कुडकुडत झोपत आहोत.”

या व्हिडीओमध्ये अर्शदने काही जमीन माफियांचीही नावे घेतली आहेत. हे लोक मुली विकण्याचेही काम करतात. मला आणि माझ्या वडिलांना खोट्या गुन्ह्यात अडकवून त्यांना माझ्या बहिणींना विकायचे होते. हे आम्हाला मान्य नव्हते, म्हणूनच आम्ही बहिणींना मारण्याचा निर्णय घेतला, असे धक्कादायक कारण अर्शदने व्हिडीओद्वारे सांगितले आहे.

लखनऊच्या सेंट्रल झोनचे पोलीस उपायुक्त रवीना त्यागी यांनी या प्रकरणावर बोलताना सांगितले की, अर्शदने आपला गुन्हा कबूल केला आहे. हत्या केल्यानंतर अर्शदने वडिलांना रेल्वे स्थानकावर सोडले आणि पोलीस ठाण्यात जाऊन शरणागती पत्करली. त्याच्या जबाबानंतर पोलिसांनी घटनास्थळावरून हत्या करण्यासाठी वापरण्यात आलेले ब्लेड आणि ओढणी ताब्यात घेतली.