Marriage Fraud : मॅट्रिमोनिअल साइट्सवरून संपर्क साधून महिलांची फसवणूक करण्यात आल्याच्या अनेक घटना समोर आलेल्या आहेत. एवढंच नाही तर अशा प्रकारच्या साइट्सवरून आर्थिक फसवणूक झाल्याचे अनेक प्रकारही पाहायला मिळतात. आता असाच एक धक्कादायक प्रकार उत्तर प्रदेशातील ग्रेटर नोएडामध्ये घडला आहे. मेट्रिमोनियल साईटवरून एका व्यक्तीने तब्बल १६ तरुणींची फसवणूक केल्याचा प्रकार समोर आला आहे. यानंतर पोलिसांनी फसवणूक करणाऱ्या तरुणाला अटक केली आहे. पोलिसांनी केलेल्या प्राथमिक चौकशीत धक्कादायक माहिती पुढे आली आहे.
नेमकं घटना काय?
आयआयएम बेंगळुरूमधून शिक्षण घेतलेल्या एका पदवीधर तरुणाने मॅट्रिमोनिअल साइट्सवरून ओळख करत १६ महिलांची फसवणूक केल्याप्रकरणी पोलिसांनी मंगळवारी आरोपीला अटक केली. २०२१ मध्ये या ३९ वर्षीय व्यक्तीने आपली नोकरी गमावलेली होती. हा व्यक्ती ग्रेटर नोएडामधील बिसरख येथील राधा स्काय गार्डन सोसायटीमध्ये वास्तव्यास होता. राहुल चतुर्वेदी असं या व्यक्तीचं नाव आहे. या राहुल चतुर्वेदीने मॅट्रिमोनिअल साइट्सवर बनावट प्रोफाइल तयार केलं होतं. तसेच अशा प्रकारची बनावट प्रोफाइल तयार करून १६ पेक्षा जास्त महिलांसह ८ लाख रुपयांची फसवणूक केल्याचा आरोप त्याच्यावर करण्यात आला आहे. यासंदर्भातील वृत्त टाइम्स ऑफ इंडियाने दिलं आहे.
सेंट्रल नोएडाचे डीसीपी शक्ती मोहन अवस्थी यांनी या प्रकरणासंदर्भात माहिती देताना सांगितलं की, “चतुर्वेदी याने आयआयएम बेंगळुरू येथे शिक्षण घेतलेलं आहे. त्याआधी मध्य प्रदेशातील एका खासगी विद्यापीठातून बीकॉम पूर्ण केलं. २०१२ ते २०१७ पर्यंत चतुर्वेदीने गुडगावमधील टेलिकॉम कंपनीत एचआर मॅनेजर म्हणून काम केलं. त्यानंतर २०१८ ते २०२१ पर्यंत त्याने बेंगळुरूमध्ये दुसऱ्या एका एमएनसी कंपनीबरोबर काम केलं. २०२२ मध्ये तो नोएडा येथे आला आणि एका भागिदाराबरोबर त्याने कापड व्यवसाय सुरु केला. याच काळात ग्रेटर नोएडातील एका ४० वर्षीय महिलेने ७ सप्टेंबर रोजी बिसरख पोलीस ठाण्यात तक्रार केली आणि हा सर्व प्रकार उघडकीस आला.”
फिर्यादीने म्हटलं की, “ती एका मॅट्रिमोनिअल साइट्सवरून आरोपीला भेटली. त्यानंतर आमचं संभाषण सुरु झालं. त्यानंतर तो तिच्या घरी जाऊन पालकांनाही भेटला. तेव्हा आपल्या आजारी वडिलांच्या उपचारासाठी पैशांची गरज आहे, असे सांगून त्याने वेगवेगळ्या व्यवहारांद्वारे तिची तब्बल २.४ लाखांची फसवणूक केली. त्यानंतर जेव्हा तिने तिचे पैसे परत मागितले त्यावेळी आरोपीने टाळाटाळ केली. त्यानंतर आरोपीने तिच्याशी संपर्क बंद केला आणि धमकी दिली, असं फिर्यादीने म्हटलं आहे.
दरम्यान, राहुल चतुर्वेदीने मॅट्रिमोनिअल वेबसाइटवर बनावट प्रोफाईल तयार करून प्रीमियम मेंबरशिप घेतल्याचे तपासात उघड झालं. तो एका बहुराष्ट्रीय कंपनीत एचआर मॅनेजर म्हणून काम करत असल्याचं भासवत संशय टाळण्यासाठी तो फोन कॉल दरम्यान त्याचा आवाज मॉड्युलेट करायचा. एवढंच नाही तर विश्वास बसण्यासाठी त्याने पगाराच्या बनावट स्लिप्स देखील बनवल्या होत्या. आता चतुर्वेदीविरुद्ध पोलीस ठाण्यात गुन्हा दाखल करण्यात आला असून त्याला पोलिसांनी अटक केली आहे. तसेच पुढील तपास सुरु आहे.
