Huge Power Cuts in Spain, Portugal and France : आठवड्याच्या सुरुवातीलाच स्पेन आणि पोर्तुगालमध्ये मोठ्या प्रमाणात वीजपुरवठा खंडित झाला आहे. यामुळे तेथील सार्वजनिक वाहतूक व्यवस्था ठप्प झाली असून ठिकठिकाणी वाहतूक कोंडीही झाली आहे. तसंच, विमान उड्डाणांना विलंब झाला असून युटिलिट ऑपरेटर वीजपुरवठा पूर्ववत करण्याकरता झगडत आहेत.
प्रादेशिक ऊर्जा कंपन्यांबरोबर काम सुरू
वीजपुरवठा खंडित झाल्यानंतर स्पॅनिश आणि पोर्तुगीज सरकारने आपत्कालीन मंत्रिमंडळाच्या बैठका बोलावल्या. पोर्तुगालच्या युटिलिटी REN ने इबेरियन द्वीपकल्पात वीजपुरवठा खंडित झाल्याची पुष्टी केली. यामुळे फ्रान्सचा काही भाग देखील प्रभावित झाला, वीज पुनर्संचयित करण्यासाठी प्रादेशिक ऊर्जा कंपन्यांसोबत काम करत असल्याची माहिती स्पॅनिश ग्रिड ऑपरेटर रेड इलेक्ट्रिकाने दिली.
“युरोपियन ऊर्जा उत्पादक आणि ऑपरेटर्सच्या समन्वयाने, ऊर्जा पुरवठा टप्प्याटप्प्याने पुनर्संचयित करण्यासाठी सर्व योजना सक्रिय केल्या जात आहेत”, असे आरईएन प्रवक्त्याने सांगितले. “आरईएन अधिकृत संस्थांशी, म्हणजेच राष्ट्रीय नागरी संरक्षण प्राधिकरणाशी सतत संपर्कात आहे. त्याच वेळी, या घटनेच्या संभाव्य कारणांचे मूल्यांकन केले जात आहे”, असंही त्यांनी स्पष्ट केलं.
स्पॅनिश रेडिओ स्टेशन्सने सांगितले की माद्रिदच्या भूमिगत रेल्वेचा काही भाग रिकामा करण्यात येत आहे. कॅडर सेर रेडिओ स्टेशनने वृत्त दिले की, ट्रॅफिक लाइट्स काम करणे बंद झाल्यामुळे माद्रिद शहराच्या मध्यभागी वाहतूक कोंडी झाली होती. रॉयटर्सच्या एका प्रत्यक्षदर्शीने दिलेल्या माहितीनुसार, माद्रिदच्या रस्त्यांवरील कार्यालयीन इमारतींबाहेर शेकडो लोक उभे होते आणि प्रमुख इमारतींभोवती मोठा पोलीस बंदोबस्त होता, ज्यामुळे वाहतूक सुरळीत झाली होती आणि मध्यवर्ती आलिशान भागातून दिवे लावून गाडी चालवली जात होती. माद्रिदमधील ब्रिटीश दूतावास असलेल्या चार टॉवर इमारतींपैकी एक रिकामी करण्यात आली आहे, असे प्रत्यक्षदर्शीने सांगितले.
देशभरातील उड्डाणसेवांना विलंब
स्थानिक रेडिओने मेट्रो कार आणि लिफ्टमध्ये अडकलेल्या लोकांचे वृत्त दिले. पोर्तुगीज पोलिसांनी सांगितले की, देशभरातील वाहतूक दिवे बंद आहेत, लिस्बन आणि पोर्तोमध्ये मेट्रो बंद आहे.” पोर्तुगालच्या टीएपी एअरच्या एका सूत्राने सांगितले की लिस्बन विमानतळ बॅक-अप जनरेटरवर चालत होते, तर स्पेनमधील ४६ विमानतळांचे व्यवस्थापन करणाऱ्या एईएनएने देशभरातील उड्डाणांना विलंब झाल्याचे वृत्त दिले आहे.
