“काश्मीरमधील शांततेचे दावे खोटे असल्याचा हा पुरावाच”, मेहबूबा मुफ्तींचा मोदी सरकारवर निशाणा!

अफगानिस्तान आणि काश्मीर…

मेहबूबा मुफ्ती यांनी आपल्या ट्वीटमध्ये अफगाणिस्तान आणि काश्मीरबाबतच्या केंद्र सरकारच्या भूमिकांची तुलना केली आहे. “केंद्र सरकारने अफगाणिस्तानमधल्या परिस्थितीच्या पार्श्वभूमीवर तेथील नागरिकांच्या हक्कांविषयी चिंता व्यक्त केली आहे. मात्र, त्याचवेळी जाणूनबुजून काश्मीरमधील जनतेला मात्र हे हक्क नाकारले आहेत”, असं मेहबूबा मुफ्ती यांनी आपल्या ट्वीटमध्ये म्हटलं आहे.

GOI expresses concern for the rights of Afghan people but wilfully denies the same to Kashmiris. Ive been placed under house arrest today because according to admin the situation is far from normal in Kashmir. This exposes their fake claims of normalcy. pic.twitter.com/m6sR9vEj3S

— Mehbooba Mufti (@MehboobaMufti) September 7, 2021

“मी घरात नजरकैद…”

दरम्यान, मुफ्ती यांनी आपल्याला घरात नजरकैदेत ठेवल्याची माहिती दिली आहे. “मला आज माझ्या घरात नजरकैदेत ठेवण्यात आलं आहे. कारण स्थानिक प्रशासनाला असं वाटतंय की काश्मीरमधील परिस्थिती अजूनही पूर्णपणे सामान्य स्तरावर आलेली नाही. काश्मीरमधील शांततेचे दावे खोटे असल्याचा हा पुरावाच आहे”, असं देखील आपल्या ट्वीटमध्ये त्यांनी नमूद केलं आहे.

फुटीरतावादी नेते सय्यद अली शाह गिलानी यांचं बुधवारी निधन झाल्यानंतर काश्मीरमध्ये सुरक्षा वाढवण्यात आली आहे. या पार्श्वभूमीवर मुफ्ती यांना देखील नजरकैदेत ठेवण्यात आलं असावं, असं सांगितलं जात आहे.

“हा नव्या भारताचा नवा काश्मीर”

रविवारी देखील मेहबुबा मुफ्ती यांनी केंद्र सरकारवर टीका केली होती. त्यांचा मृतदेह पाकिस्तानी झेंड्यामझ्ये गुंडाळल्याप्रकरणी गुन्हा दाखल करण्यात आल्यावरून मुफ्ती यांनी सरकारवर निशाणा साधला होता. “काश्मीरला एक खुलं तुरुंग केल्यानंतर आता मृत झालेल्या व्यक्तींना देखील सोडलं जात नाहीये. एका कुटुंबाला त्यांच्या मर्जीने जवळच्या व्यक्तीच्या मृत्यूनंतर शोक व्यक्त करणं आणि त्याच्यावर अंत्यसंस्कार देखील करू दिले जात नाहीयेत. हा नव्या भारताचा नवा काश्मीर आहे”, असं मुफ्ती म्हणाल्या होत्या.