धर्मशालाला भूकंपाचा सौम्य धक्का

थंड हवेचे ठिकाण म्हणून प्रसिद्ध असलेल्या हिमाचल प्रदेशातील धर्मशाला येथे सोमवारी भूकंपाचा सौम्य धक्का बसला. सोमवारी सकाळी १ वाजून ५३ मिनिटांनी हा भूकंपाचा धक्का जाणवला, अशी माहिती डेहराडूनच्या भूगर्भशास्त्र विभागाने दिली आहे.या भूकंपाची तीव्रता रिश्टर स्केलवर ४.५३ इतकी नोंदविण्यात आली. सुमारे साडेचार सेकंद इतका ह्या भूकंपाचा कालावधी होता. कांगा जिल्ह्यातील बैजनाथपासून १७ किलोमीटर अंतरावर या भूकंपाचा केंद्रबिंदू होता, अशी माहिती भूगर्भशास्त्र विभागाने दिली. या भूकंपामध्ये कोणतीही वित्त किंवा जीवित हानी झालेली नाही. यापूर्वीही सप्टेंबर महिन्यात या परिसराला भूकंपाचे दोन सौम्य धक्के जाणवले होते.