दहशतवाद्याच्या आईला इसिसचा प्रचार केल्याबद्दल शिक्षा

इसिस या दहशतवादी संघटनेच्या दहशतवाद्याच्या ५५ वर्षीय आईला इसिसचा फेसबुकवरून प्रचार केल्याबद्दल मलेशियन न्यायालयाने ३० महिन्यांची तुरुंगवासाची शिक्षा सुनावली आहे.
अझिझाह युसूफ असे या महिलेचे नाव असून तिच्या शिक्षेवर शुक्रवारी शिक्कामोर्तब करण्यात आले. अझिझाहला २८ एप्रिल रोजी अटक करण्यात आल्यानंतर उच्च न्यायालयाचे न्यायाधीश कामारदिन हाशिम यांनी तिला शिक्षा ठोठावली. अझिझाहला शिक्षा सुनावल्यामुळे इसिस या दहशतवादी संघटनेत सहभागी न होण्याचा संदेश तरुणांना मिळेल, असेही न्यायालयाने स्पष्ट केले. काही जणांनी अझिझाहने सुरक्षा कायद्याचे उल्लंघन केल्याची माहिती दिल्यावर पोलिसांनी अझिझाहला ताब्यात घेतले. पोलिसांनी अझिझाहच्या घरातून संगणक आणि हेडफोन जप्त करून चाचणीसाठी पाठविला आहे. तपासादरम्यान अझिझाहची फेसबुकवर दोन खाती असल्याचे स्पष्ट झाले. एक खाते २०१३ मध्ये तिच्या मुलीने उघडले होते. मुलगा इसिसमध्ये सहभागी झाल्यावर तिने दुसरे फेसबुक खाते उघडले. तिच्या मुलाने सीरियातील विविध घडामोडी आईला पाठविल्यावर अझिझाहने मुलाने दिलेली माहिती पसरविण्यास सुरुवात केली.