Turkey Earthquake: या घटनेला लोक चमत्कार म्हणतायत! १२८ तासानंतर ढिगाऱ्याखालून नवजात बाळ सुखरुप बाहेर

वियोन न्यूज या वेबसाईटने दिलेल्या माहितीनुसार दक्षिण टर्कीमध्ये बचाव कार्य सुरु असताना एका इमारतीच्या ढिगाऱ्याखालून दोन महिन्यांचे एक बाळ भूकंपाच्या १२८ तासांनंतर सुखरुप बाहेर काढले गेले. एकाबाजूला या भूकंपामुळे हजारो नागरिकांना आपले प्राण गमवावे लागले आहेत. तर दुसऱ्या बाजूला नवजात बाळाला सुखरुप बाहेर काढल्यानंतर याला निसर्गाचा चमत्कार असल्याचे बोलले जात आहे. टर्की आण सीरियामध्ये ६ फेब्रुवारी रोजी ७.८ रिश्टर स्केलच्या भूकंपाचे धक्के बसले होते. त्यानंतर जगभरातून मदतीचा ओघ दोन्ही देशाकडे सुरु झाला आहे. भारताने ऑपरेशन दोस्तच्या अंतर्गत मदत पाठविली आहे. भारताची एनडीआरएफ टीम टर्की आणि सीरियामध्ये बचाव कार्य करत आहे.

टर्कीमध्ये भूकंपामुळे इमारती जमीनदोस्त, लाखों इमारतींना तडे

टर्की आणि सीरियामध्ये आलेल्या विनाशकारी भूकंपामुळे मोठा प्रलय माजला. दोन्ही देशांमध्ये मिळून २६ हजार लोकांचा मृत्यू झाल्याचा अंदाज व्यक्त करण्यात आला आहे. हा आकडा आणखी वाढू शकतो, असेही सांगण्यात येत आहे. दोन्ही देशामध्ये बचावकार्य सुरु आहे. बचावकार्य करणाऱ्या पथकाने मृत्यूचा आकडा आणखी वाढू शकतो, अशी शक्यता वर्तविल्यामुळे भूकंपाचा विनाश काही थांबताना दिसत नाही. बचावकार्य करणाऱ्या पथकाने सांगितले की अजूनही शेकडो परिवार ढिगाऱ्याखाली अडकलेले आहेत. टर्कीमधील १० राज्यांमध्ये भूकंपाची तीव्रता अधिक होती, तिथे फार मोठ्या प्रमाणात नुकसान झाल्याचे कळते. याठिकाणी जवळपास १० हजार इमारती जमीनदोस्त झाल्या आहेत. तर एक लाख इमारतींना तडे जाऊन इमारतींचे नुकसान झाले आहे.

सीरियामध्ये ५३ लाख लोक बेघर होण्याची भीती

एसएमएचच्या बातमीनुसार, सीरियामध्ये कडक थंडी आणि भूकंपामुळे हजारो लोक बेघर झाले आहेत. अनेकांना अन्न मिळत नाहीये. टर्की आणि सीरिया सरकारला लोकांच्या आरोपांना तोंड देत बचाव कार्य करावे लागत आहे. बचाव कार्य करण्यासाठी संपूर्ण जगाने पुढाकार घेतला असून अनेक देशातील बचाव पथके दोन्ही देशांमध्ये लोकांचे जीव वाचविण्यासाठी अथक प्रयत्न करत आहेत. यादरम्यान संयुक्त राष्ट्र संघाने एक भीती वर्तविली आहे. टर्की आणि सीरियामध्ये जवळपास आठ लाख लोकांना अन्नपदार्थाची आवश्यकता आहे. तर एकट्या सीरियामध्ये ५३ लाख लोक बेघर होण्याची भीती वर्तविली जात आहे.