मॉडेल अनुकृती गोसाईची काँग्रेसला सोडचिठ्ठी; महिन्याभरापूर्वीच ईडीने बजावली होती नोटीस

उत्तराखंडचे माजी वन मंत्री आणि काँग्रेसचे ज्येष्ठ नेते हरकसिंह रावत आणि त्यांच्या सून अनुकृती यांना ईडीने चौकशीसाठी नोटीस बजावली होती. ७ फेब्रुवारी रोजी उत्तराखंड, नवी दिल्ली आणि हरियाणातील १७ ठिकाणी ईडीने छापेमारी केली होती. वन घोटाळा प्रकरणात ईडीने पीएमएलए कायद्याअंतर्गत गुन्हा दाखल केला आहे.

माजी वन मंत्री रावत यांनी २०१९ साली पाखरो व्याघ्र राखीव क्षेत्र आणि कॉर्बेट राष्ट्रीय उद्यान येथे बेकायदेशीरपणे हजारो झाडे तोडण्यासंदर्भात आदेश दिले होते, तसेच आर्थिक गैरव्यवहार आणि अनधिकृत बांधकाम केल्याचाही त्यांच्यावर आरोप ठेवण्यात आला होता. रावत हे पूर्वी भाजपामध्ये होते. भाजपा सरकारच्या काळात वनमंत्री असताना त्यांनीच पाखरो व्याघ्र प्रकल्प विकासाचे काम पूर्ण केले होते.

रावत यांचा पुर्वेतिहास पक्ष बदलण्याचा राहिला आहे. १९९१ साली त्यांनी पहिल्यांदा भाजपाच्या तिकीटावर आमदारकी मिळवली होती. एकत्रित उत्तर प्रदेशच्या कल्याण सिंह सरकारमध्ये त्यांनी सर्वात तरूण आमदार म्हणून काम केले होते. त्यानंतर त्यांनी बसपामध्ये प्रवेश केला. १९९८ साली बसपाने त्यांना तिकीट नाकारल्यानंतर रावत यांनी काँग्रेसमध्ये प्रवेश केला. त्यानंतर २००२ आणि २००७ साली काँग्रेसच्या तिकीटावर त्यांनी विधानसभेत विजय मिळवला. २००७ ते २०१२ या काळात रावत विधानसभेचे विरोधी पक्षनेते होते.

रावत यांच्या सून अनुकृती या २०१४ सालच्या मिस इंडिया एशिया पॅसिफिक वर्ल्ड या स्पर्धेत सहभागी झाल्या होत्या. तसेच मिस ग्रँड आंतरराष्ट्रीय स्पर्धेत २०१७ त्यांनी भारताचे प्रतिनिधित्व केले होते. २०२२ साली त्यांनी विधानसभा निवडणुकीच्या माध्यमातून राजकारणात पाऊल ठेवले होते. भाजपाचे आमदार दलीप सिंह रावत यांनी अनुकृती यांचा पराभव केला.