माऊस पोरका झाला!

दैनंदिन आयुष्यात आपण संगणकावर किती वेळ घालवतो? या प्रश्नााचे उत्तर व्यक्तीसापेक्ष वेगवेगळे असेल. मात्र, या उत्तरात एक समान धागा असेल, तो म्हणजे माऊसच्या वापराचा. आता हा माऊस आपल्या आयुष्याचा एक अविभाज्य घटकच झाला आहे. या माऊसला त्याची स्वतची अशी एक कुळकथा आहे. या कुळकथेचे सूत्रधार अर्थात माऊसचे जन्मदाते, डग्लस एंजलबर्ट (८८) यांचे गुरुवारी निधन झाले. माऊस पोरका झाला. किडनीच्या आजाराने त्रस्त असलेल्या एंजलबर्ट यांनी कॅलिफोर्नियातील त्यांच्या निवासस्थानी अखेरचा श्वास घेतला.
माऊसची जन्मकथा
टचस्क्रीन, टॅबलेट पीसी, स्मार्टफोन या नित्यनव्या गॅजेट्सच्या धबडग्यात आताशा माऊसचा वापर कमी होत चालला आहे. मात्र, असे असले तरी आज जगातील कोटय़वधी संगणक वापरकर्ते माऊसचा वापर करतातच. आता जो माऊस वापरला जातो तो उत्कांक्रित होऊन आलेला आहे. किंबहुना जगाला संगणक, इंटरनेट, ई-मेल असे शब्दही माहीत नसतील अशा काळात माऊसला जन्म दिला तो एंजलबर्ट यांनी.
३० जानेवारी १९२५ रोजी जन्मलेल्या एंजलबर्ट यांच्या कारकीर्दीची सुरुवात झाली ती स्टॅनफोर्ड संशोधन संस्थेतून (आताची एसआरआय इंटरनॅशनल).  या संस्थेतच त्यांनी जगातील पहिलावहिला माऊस तयार केला.
एंजलबर्ट यांनी हा माऊस तर तयार केला परंतु त्याचे स्वामित्वहक्क त्यांना मिळाले १९७० मध्ये. एंजलबर्ट यांनी १९५७ मध्ये एसआरआयमध्ये उमेदवारी सुरू केली. त्यानंतर १९५९ ते १९७७ या १८ वर्षांच्या कालावधीत त्यांनी एसआरआयच्या ऑगमेंटेशन रिसर्च सेंटरचे नेतृत्व केले. याच काळात त्यांनी अर्पानेटचा शोध लावला, जे की इंटरनेटचे प्राथमिक रूप ठरले.