नरेंद्र मोदींची ‘व्हायब्रंट गुजरात’ ही तर मार्केटींग खेळी- सचिन पायलट

गुजरात राज्य सरकारव्दारे केल्या जाणाऱ्या ‘व्हायब्रंट गुजरात परिषद’ ही एक मार्केटींग खेळी असल्याची टीका केंद्रीय कॉर्पोरेट कामकाज मंत्री सचिन पायलट यांनी केली आहे. गुंतवणूकदारांना आकर्षित करण्यासाठी ही खेळी नरेंद्र मोदी सरकारव्दारे केली जाते. असेही ते म्हणाले. त्याचबरोबर “कोणत्याही गोष्टीचे श्रेय घेणे आणि प्रत्यक्षात ती गोष्ट करणे या दोन्ही वेगवेगळ्या गोष्टी असल्याचे नरेंद्र मोदींनी लक्षात घेणे आवश्यक आहे” असे सचिन पायलट म्हणाले. ते एका मुलाखती दरम्यान बोलत होते.
‘व्हायब्रंट गुजरात परिषदे’अंतर्गत कऱण्यात आलेल्या घोषणांपैकी किती घोषणा प्रत्यक्ष गुंतवणुकीमध्ये उतरल्या याची चौकशी तुम्ही करणार का? याबद्दल पायलट यांना मुलाखतीत विचारले असता. “कोणी काय केले अथवा काय नाही, हे बघणे माझे काम नाही. पण, यासंदर्भात तक्रारी आल्यास मी नक्की चौकशी करेन” असे पायलट यांनी स्पष्ट केले.
नरेंद्र मोदी यांनी माध्यमे, प्रभावी मार्केटींग आणि जनसंपर्क सहाय्याने गुजरात विकासाचे अतिशयोक्ती चित्र जनतेसमोर उभे केले असल्याचेही सचिन पायलट म्हणाले. “गुजराथी समाजाने विदेशात जाऊन प्रगती साधली आहे. यात गुजरात सरकारचे कोणतेच श्रेय नाही. याआधीच म्हणजे १९५० सालापासून कॅनडा, अमेरिका येथे गुजराथी समाजाचे वास्तव्य होते. त्यांनी तेथे राहून स्वकष्टावर आपापले व्यवसाय सुरू केले. यात गुजरात सरकाने कोणतीही भूमिका बजावलेली नाही हेही लक्षात घेतले पाहिजे. असेही सचिन पायलट यांनी स्पष्ट केले.