वरण-भात, भाजी-चपातीऐवजी तुरुंगातील कैद्यांना मिळणार पावभाजी, खीर आणि छोले भटुरे

तिहारमधील तुरुंगातील कैद्यांनी अनेकदा त्यांना देण्यात येणाऱ्या अन्नपदार्थांच्या दर्जासंदर्भात तक्रार केली होती. अनेकदा कैद्यांनी तरुंग अधिकाऱ्यांना सकाळ, दुपार, संध्याकाळ अशा तीन वेळेस देण्यात येणारे जेवण बेचव असल्याची तक्रार केली होती. याच सततच्या तक्रारींची दखल घेत तुरुंग प्रशासनाने कैद्यांना वेगळे पदार्थ देण्याचा निर्णय घेतला आहे. या निर्णयानंतर आता कैद्यांना पावभाजी, बदामी पुरी, छोटे भटुरे, खीर, मलाईचापसारखे चविष्ट पदार्थ चाखता येणार आहेत. एक जानेवारीपासून हे पदार्थ कैद्यांना देण्यास सुरुवातही झाली आहे. या नवीन बदलामुळे कैदी समाधानी असल्याचे तुरुंग अधिकाऱ्यांनी सांगितले आहे. नवीन पदार्थांची चव आणि दर्जा कैद्यांना आवडला असून त्यांनी याबद्दल समाधान व्यक्त केल्याचे पोलिसांचे म्हणणे आहे.

पोलीस अधिक्षक ठरवणार आठवड्याचा मेन्यू

तुरुंग प्रशासनाने पोलीस अधिकक्षकांना आठवड्याचा मेन्यू आधीच ठरवण्याचे आदेश दिले आहेत. त्यामुळे पुढील आठवड्यात आपल्याला कोणते पदार्थ खायला मिळणार आहेत हे कैद्यांना आधीच समजणार आहे. आधी कैद्यांना सकाळचा नाश्ता म्हणून चहा आणि दोन बिस्कीटे दिली जायची, पण आता नवीन नियमानुसार अधिक चांगला नाश्ता कैद्यांना देण्यात येणार आहे.