देशात आता 3D गतिरोधक?, नितीन गडकरींची संकल्पना

शाळा, बाजार, रुग्णालयाजवळील मुख्य रस्त्यावर वाहनांची गती कमी करण्यासाठी बांधण्यात येणारे गतिरोधक हद्दपार होण्याची शक्यता आहे. कारण, देशात आता रस्त्यांवर त्रिमितीय (3D) गतिरोधक आणण्याची संकल्पना केंद्रीय भूपृष्ठ वाहतूक मंत्री नितीन गडकरी यांनी सुचवली आहे. गतिरोधक बांधण्याऐवजी त्याजागी 3D पद्धतीने गतिरोधकाचे चित्र रेखाटण्याची कल्पना प्रायोगिक तत्त्वावर राबविण्याचा मानस आहे, असे ट्विट गडकरी यांनी केले आहे. त्यामुळे हा प्रयोग यशस्वी झाल्यास देशातून गतिरोधक हद्दपार होण्याची शक्यता आहे.
दरम्यान, नितीन गडकरी यांच्या ट्विटची सोशल मीडियावर जोरदार चर्चा रंगली आहे. नितीन गडकरींच्या या नव्या संकल्पनेचे काहींनी स्वागत केले आहे, तर काही जणांनी त्यास विरोध देखील केला आहे.