बिहारमध्ये नितीश कुमारच ‘बिग बॉस’, नरेंद्र मोदींना JDS ने दिला सूचक इशारा

नितीश कुमार भाजपा प्रणीत राष्ट्रीय लोकशाही आघाडीचा बिहारमधील चेहरा आहेत. नितीश बिहारमध्ये लोकप्रिय असल्यामुळेच ते आज राज्याचे मुख्यमंत्री आहेत असे जेडीयूचे राष्ट्रीय सरचिटणीस पवन वर्मा यांनी बैठकीनंतर सांगितले. २०१५ मध्ये बिहार विधानसभा निवडणुकीत जेडीयू-आरजेडीच्या विजयाचे शिल्पकार असलेले प्रशांत किशोरही या बैठकीला उपस्थित होते.

केंद्रातल्या नरेंद्र मोदी सरकारला चारवर्ष पूर्ण झाल्याच्या निमित्ताने गुरुवारी भाजपा आणि अन्य घटक पक्षांची बैठक होणार आहे. त्याआधी बैठकीत काय भूमिका मांडायची यावर चर्चा करण्यासाठी जेडीयूची आज मुख्यमंत्र्यांच्या निवासस्थानी बैठक झाली. पोट निवडणुकीच्या निकालानंतर एनडीएमधील घटकपक्षांनी भाजपा जास्त काळ मोठया भावाची भूमिका बजावू शकणार नाही असे स्पष्ट केले आहे.

सर्वच पक्षांनी पुढच्यावर्षी होणाऱ्या लोकसभा निवडणुकीच्या दृष्टीने तयारी सुरु केली आहे. बिहारमध्ये लोकसभेच्या जागावाटपावरुन भाजपा आणि जेडीयूमध्ये मतभेद होण्याची शक्यता आहे. जास्तीत जास्त जागा पदरात पाडून घेण्यासाठी आतापासूनच जेडीएसने दबावाचे राजकारण सुरु केले आहे.