नितीशकुमार सरकार तरले

‘कॉपरेरेट लॉबी’ने मोदींची लाट निर्माण केली-नितीश
गुजरातचे मुख्यमंत्री नरेंद्र मोदी यांच्याबाबत देशभरात ‘कॉपरेरेट लॉबी’ने लाट तयार केली आहे. मात्र ही हवा अल्पकालीन असून कोणतीही जादू करण्यास असमर्थ ठरणार असल्याची टीका बिहारचे मुख्यमंत्री नितीश कुमार यांनी म्हटले .विश्वासदर्शक ठरावाच्या पाश्र्वभूमीवर बोलताना नितीश कुमार म्हणाले की, सध्या देशभरात मोदींच्या नावाचा उदोउदो होत आहे. त्यामुळे भाजप कार्यकर्त्यांमध्येही उत्साहाचे वातावरण पसरले आहे. मात्र देशात मोदी लाट नसून केवळ ‘कॉपरेरेट लॉबी’ने त्यांच्या नावाची हवा निर्माण केली आहे. त्यामुळे मोदी नावाची ही लाट २०१४ च्या निवडणुकीत कोणताही करिष्मा दाखवू शकणार नाही, असे नितीश कुमार म्हणाले.

विरोधी पक्षनेत्याच्या निवडीवरून भाजपमध्ये असंतोष
विश्वासघात केल्याचा आरोप करीत जेडीयूशी वाद घालणाऱ्या बिहार भाजपमधील अंतर्गत असंतोषही आता समोर आला आहे. बिहार विधानसभेतील विरोधी पक्षनेता निवडताना पक्षाने आपल्याला विश्वासात घेतले नसल्याचा आरोप आमदारांनी केला आहे.
जेडीयूशी काडीमोड घेतल्यानंतर विरोधी बाकांवर बसण्याचा निर्णय घेणाऱ्या भाजपच्या संसदीय समितीने नंदकिशोर यादव यांची विरोधी पक्षनेतेपदी निवड केली आहे. मात्र यादव यांची निवड करताना आपल्याला विश्वासात घेतले नसल्याचा आक्षेप प्रेम कुमार, चंद्रमोहन राय, गिरिराज सिंग आणि विक्रम कुवर आदी वरिष्ठ आमदारांनी केला आहे. नितीशकुमार यांच्या मंत्रिमंडळात शहरी विकासमंत्री असणाऱ्या प्रेम कुमार यांनी आमदारांना विश्वासात न घेतल्यामुळे संसदीय समितीच्या बैठकीवर आपण बहिष्कार टाकल्याचे स्पष्ट केले, तर इतरही आमदारांनी आपल्याला कोणतीही कल्पना न दिल्यामुळे यादव यांच्या निवडीबद्दल नाराजी व्यक्त केली.
दरम्यान, विधान परिषदेच्या नेतेपदी भाजपने माजी उपमुख्यमंत्री सुशिलकुमार मोदी यांची निवड केल्याचे पक्षाच्या सूत्रांनी स्पष्ट केले.