‘पंतप्रधान अध्यक्षस्थानी असताना उपराष्ट्रपतींना बोलावणे राजशिष्टाचाराला धरून नाही’

राजपथ येथे पार पडलेल्या ‘आंतरराष्ट्रीय योग दिना’च्या कार्यक्रमाला उपराष्ट्रपती हमीद अन्सारी यांना निमंत्रणच दिले नसल्याची खळबळजनक माहिती समोर आली होती. राम माधव यांनी ट्विटच्या माध्यमातून अन्सारी यांच्या योग दिनाच्या कार्यक्रमातील अनुपस्थितीवर प्रश्नचिन्ह उपस्थित केले होते. त्यानंतर सत्ताधारी आणि विरोधी पक्षामध्ये आरोप-प्रत्यारोपांच्या फैरी झडण्यास सुरूवात झाली होती. हमीद अन्सारी यांना सरकारकडून कार्यक्रमासाठी कोणतेही निमंत्रणच देण्यात आले नव्हते, असे प्रत्युत्तर माधव याच्या ट्विटला अंन्सारींच्या कार्यालयाकडून देण्यात आले. त्यांनतर हमीद अन्सारी यांची प्रकृती ठीक नसल्याचे माझ्या कानावर आल्याचे सांगत राम माधव यांनी याप्रकाराविषयी दिलगिरी व्यक्त केली आणि संबंधित ट्विट अकाऊंटवरून काढूनही टाकले होते.

काँग्रेस नेते माजिद मेमन यांनी या प्रकरणी जोरदार टीका केली आहे. अशाप्रकारच्या महत्त्वाच्या कार्यक्रमासाठी उपराष्ट्रपतींना निमंत्रितांच्या यादीतून वगळण्यातच कसे येऊ शकते आणि ते मुस्लिम असल्यामुळे असे करण्यात आले का, असा सवाल उपस्थित केला आहे. ही गंभीर चूक असून पंतप्रधानांनी त्याविषयी स्पष्टीकरणाची मागणीही मेमन यांनी केली होती.