केंद्र सरकार, राज्यपाल यांना व्यापम प्रकरणात नोटिसा

सरन्यायाधीश एच.एल.दत्तू व न्या. शिवकीर्ती सिंह, अमिताव रॉय यांनी याचिकाकर्त्यांचे वकील कपिल सिब्बल यांचे म्हणणे मान्य केले असून संबंधितांना नोटिसा दिल्या आहेत. ही याचिका कार्यकर्ते संजय शुक्ला यांनी दाखल केली होती. त्यापूर्वी सर्वोच्च न्यायालयात आणखी एक याचिकाही दाखल करण्यात आली असून त्यात व्यापम घोटाळ्यात सामील असलेले मध्यप्रदेशचे राज्यपाल राम नरेश यादव यांना पदावरून काढण्याची मागणी केली आहे. यादव यांना हटवण्याची मागणी करणारी याचिका काही वकिलांनी सादर केली असून त्या प्रकरणी त्यांचे निवेदन नोंदवण्याची मागणीही केली होती. मध्यप्रदेशातील कोटय़वधी रूपयांच्या व्यापम घोटाळ्यात अनेक उच्चभ्रू अडकले असून त्यात व्यावसायिक, राजकारणी व नोकरशहा यांचा समावेश आहे. मध्यप्रदेश व्यावसायिक परीक्षा मंडळ म्हणजे व्यापम या संस्थेने शिक्षक, वैद्यकीय अधिकारी, कॉन्स्टेबल, वनरक्षक या पदांच्या भरतीसाठी घेतलेल्या परीक्षा व इतर प्रक्रियात खूप मोठा घोटाळा झालेला आहे.