नवी दिल्ली : पंतप्रधान नरेंद्र मोदी यांच्या मॉस्को आणि कीव भेटीनंतर युक्रेन संघर्षावर तोडगा काढण्याचे आवाहन भारताने केले होते. या पार्श्वभूमीवर राष्ट्रीय सुरक्षा सल्लागार (एनएसए) अजित डोभाल येत्या आठवड्यात रशिया दौऱ्यावर जाणार असल्याची माहिती अधिकृत सूत्रांनी दिली. डोभाल प्रामुख्याने ब्रिक्स (ब्राझील-रशिया-भारत-चीन-दक्षिण आफ्रिका) गटांच्या राष्ट्रीय सुरक्षा सल्लागारांच्या परिषदेला उपस्थित राहण्यासाठी रशियाला भेट देत आहेत. दोन्ही देशांमधील संघर्ष संपवण्यासाठी होत असलेल्या शांततापूर्ण चर्चेच्या टप्प्यावर ही परिषद होणार आहे. हेही वाचा >>> शेख हसीना यांच्या प्रत्यार्पणाचे प्रयत्न; विद्यार्थी आंदोलनादरम्यान सामूहिक हत्याकांडाचा आरोप डोभाल या दौऱ्यावर रशियन समकक्षांशी चर्चा करतील आणि या भागात शांतता प्रस्थापित करण्याच्या उपाययोजनांवर विचारविनिमय होण्याची शक्यता आहे. पंतप्रधान नरेंद्र मोदी यांच्या युक्रेनची राजधानी कीव दौऱ्याच्या अडीच आठवड्यांनंतर डोभाल यांचा रशिया दौरा होत आहे. शनिवारी इटलीच्या पंतप्रधान जॉर्जिया मेलोनी यांनी युक्रेनचे अध्यक्ष लोदिमिर झेलेन्स्की यांच्याशी चर्चा केली. भारत आणि चीन हे दोन्ही देशच वादावर तोडगा काढण्यात महत्त्वाची भूमिका बजावू शकतात, असे त्यांनी सांगितले. रशियाचे अध्यक्ष पुतिन यांनी गुरुवारी व्लादिवोस्तोक शहरातील ‘ईस्टर्न इकॉनॉमिक फोरम’च्या पॅनेल चर्चेत बोलताना भारत, ब्राझील आणि चीन या देशांना संभाव्य ‘मध्यस्त’ म्हणून संबोधले. हे देश विवाद सोडवण्यासाठी भूमिका बजावू शकतात, असे ते म्हणाले. ‘मी चीन, ब्राझील आणि भारत या माझ्या भागीदारांच्या संपर्कात आहे. या देशांचे नेते आणि आमचे एकमेकांशी विश्वासाचे संबंध आहेत. ते या वादात स्वारस्य दाखवतील, असेही त्यांनी नमूद केले.
