भारताचे संरक्षण मंत्री राजनाथ सिंह यांनी बुधवारी रशियाचे संरक्षण मंत्री सेर्गेई शोइगु यांच्याशी फोनवरून संवाद साधला आहे. यावेळी राजनाथ सिंह यांनी युक्रेनसोबत सुरू असलेल्या युद्धात ‘डर्टी बॉम्ब’वापरण्याच्या कथित धोक्याबद्दल चिंता व्यक्त केली. युक्रेनकडून ‘डर्टी बॉम्ब’चा वापर केला जाईल, याची आम्हाला चिंता आहे, असं शोईगु यांनी मंगळवारी सांगितलं होतं. त्यानंतर कथित ‘डर्टी बॉम्ब’चा हल्ला रोखण्यासाठी रशिया अणुहल्ला करू शकतो, याबाबत जगभरात चिंता व्यक्त केली गेली.
याच पार्श्वभूमीवर संरक्षण मंत्री राजनाथ सिंह यांनी सेर्गेई शोइगु यांच्याशी फोनवरून संवाद साधला. रशिया आणि युक्रेन या दोन्ही देशांनी लवकरात लवकर मुत्सद्देगिरी आणि चर्चेच्या माध्यमातून हा संघर्ष सोडवावा, असं आवाहन राजनाथ सिंह यांनी केलं. कोणत्याही परिस्थितीत अणुयुद्ध टाळलं पाहिजे, कारण अशा शस्त्रांचा वापर मानवतेच्या मूलभूत तत्त्वांच्या विरुद्ध आहे, असंही राजनाथ सिंह म्हणाले.
दरम्यान, शोईगु यांनी रविवारी या विषयावर नाटोच्या संरक्षणमंत्र्यांशी अनेकदा चर्चाही केली होती. तर किरणोत्सर्गी धोकादायक बॉम्ब वापरण्याच्या तयारीत असल्याचा रशियाचा आरोप युक्रेन आणि त्याच्या मित्र राष्ट्रांनी फेटाळला, उलट रशिया अशा गोष्टींचा वापर करून युद्ध आणखी वाढवत आहे, असा आरोप युक्रेनने केला आहे. रशिया आणि युक्रेनमधील संघर्षांच्या पार्श्वभूमीवर रशियाच्या संरक्षणमंत्र्यांच्या पुढाकाराने हे संभाषण झाले. संघर्ष थांबवण्यासाठी संवाद आणि मुत्सद्देगिरीच्या मार्गाचा अवलंब करण्याच्या भारताच्या भूमिकेचा सिंह यांनी पुनरुच्चार केला, असे संरक्षण मंत्रालयाने सांगितले.
युक्रेनकडून ‘डर्टी बॉम्ब’चा हल्ला होऊ शकतो, याबाबत शोईगु यांनी भीती व्यक्त केल्यानंतर, भारतीय दूतावासाने खबरदारीचं पाऊल उचललं आहे. युक्रेनमधील सर्व भारतीय नागरिकांनी लवकरात लवकर युद्धभूमीतून बाहेर पडावं, असा आदेश भारतीय दूतावासानं दिला आहे. तसेच भारतीय नागरिकांना कसलीही मदत आवश्यक असेल तर भारतीय दूतावासाची संपर्क साधावा, असंही आदेशात म्हटलं आहे.
‘डर्टी बॉम्ब’ म्हणजे काय?
‘डर्टी बॉम्ब’ हा एक धोकादायक बॉम्ब आहे. यामध्ये किरणोत्सारी घटकांचा वापर केला जातो. डर्टी बॉम्बच्या स्फोटानंतर यातील विषारी घटक हवेत पसरतात. त्यामुळे नागरिकांच्या आरोग्यावर दूरगामी परिणाम होऊ शकतो. डर्टी बॉम्ब हा अणुबॉम्बएवढा विध्वंसक नसला तरी लाखो लोकांचं जीवनमान उद्धवस्त करण्याची क्षमता या बॉम्बमध्ये असल्याचं मत तज्ज्ञांकडून व्यक्त केलं जात आहे.
