छत्तीसगडमध्ये राजनांदगाव येथे झालेल्या चकमकीत चार नक्षलवाद्यांचा खात्मा झाला. मात्र या मध्ये पोलीस उपनिरीक्षक श्यामकिशोर शर्मा हे शहीद झाले. छत्तीसगडमधील नक्षलग्रस्त भाग असलेल्या मानपूर ठाणा क्षेत्रातील पारधोनी गावाजवळ शुक्रवारी मध्यरात्री ही चकमक झाल्याची माहिती समोर आली आहे.

या चकमकीनंतर घटनास्थळावरून जवानांनी नक्षलवाद्यांचे मृतदेह ताब्यात घेतले, तसेच एक एके-47 रायफल, एक एसएलआर रायफल, दोन 315-बोर रायफलसह शस्त्रसाठा जप्त करण्यात आला. या चकमकीत ठार झालेल्या नक्षलवाद्यांमध्ये दोन महिला नक्षलींचा समावेश आहे.

नक्षल मोहीमेचे एएसपी जी एन बघेल यांनी सांगितले की, पोलिसांचे पथक शुक्रवारी रात्री जंगल परिसरात शोध मोहीमेवर निघाले होते. याच दरम्यान दबा धरून बसलेल्या नक्षलवाद्यांनी जवानांवर गोळीबार सुरू केला. पोलिसांनी देखील चोख प्रत्युत्तर दिले. जवळपास एक तास गोळीबार सुरू होता.