पंजाबमध्ये ढोबळी मिरचीला एक रुपया दर, संतप्त शेतकऱ्यांकडून माल रस्त्यावर फेकून आंदोलन

तीन लाख हेक्टरवर भाजीपाला लागवड 

पंजाबमध्ये सुमारे तीन लाख हेक्टरवर भाजीपाल्याची लागवड केली जाते. त्यात ढोबळी मिरचीची लागवड सुमारे १५०० हेक्टरवर करण्यात आली आहे. त्यातील संगरुरमध्ये ५००, फिरोजपूरमध्ये १०० आणि मानसामध्ये २५० हेक्टरवर लागवड झाल्याची माहिती पंजाबच्या कृषी विभागाने दिली.

हवामान बदलाचा असाही फटका

• महाराष्ट्र, मध्य प्रदेश आणि पंजाबमध्ये प्रामुख्याने ढोबळी मिरचीचे उत्पादन होते.

• जानेवारी-फेब्रुवारी महिन्यांत महाराष्ट्र, मध्य प्रदेशातील आणि मार्च-एप्रिलमध्ये पंजाबमधील मिरची काढणीला येते.

• पण यंदा थंडीचे दिवस कमी होणे, अवकाळी पाऊस आणि तापमान वाढ, अशा विविध कारणांमुळे ढोबळी मिरचीची काढणी एकाच वेळी सुरू झाली.

• त्यामुळे मिरचीची बाजारातील उपलब्धता वाढून, दर कोसळले आहेत, अशी माहिती पंजाबच्या फलोत्पादन विभागाचे संचालक शैलेंद्र कौर यांनी दिली.

एक एकर क्षेत्रावर ढोबळी मिरची लागवडीसाठी सरासरी एक लाख रुपये खर्च केला आहे. आता प्रति किलो एक रुपयाही दर मिळत नाही. राज्याबाहेर ढोबळी मिरची विकण्यासाठी सरकारने आम्हाला आर्थिक मदत करावी.

– सुखदेव सिंग, शेतकरी, कोटली कलान (जि. मानसा )