चेन्नईतील खतनिर्मिती प्रकल्पातून वायूगळती; अनेक जणांना बाधा

चेन्नई : चेन्नईच्या उत्तर भागात एन्नोर येथील खतनिर्मिती प्रकल्पा समुद्रात जाणाऱ्या उपवाहिनीतून मंगळवारी रात्री उशिरा अमोनिया वायूची गळती झाली. या गळतीमुळे नागरिकांना अस्वस्थता, धाप लागणे, श्वासोच्छवासास अडचण, मळमळ अशा समस्यांना तोंड द्यावे लागले. त्यानंतर सुमारे २५ जणांना रुग्णालयात दाखल करण्यात आल्याचे संबंधित अधिकाऱ्यांनी सांगितले. ही घटना मगंळवारी रात्री उशिरा ११ वाजून ४५ मिनिटांनी घडली. परिसरात वायू पसरल्याने नागरिकांत मोठी घबराट पसरली. त्यांची कोंडी झाली. वायूच्या दुष्परिणामामुळे बाधितांच्या घसा आणि छातीत जळजळ होऊ लागली आणि अनेक जण बेशुद्ध पडले. वायूगळतीची माहिती मिळताच अनेक जण घाबरून घराबाहेर पडले आणि रस्त्यावर जमा झाले. खत निर्मिती प्रकल्पाच्या आसपास राहणाऱ्या २५ जणांना रुग्णालयात दाखल करण्यात आले होते. यात लहान मुलांचाही समावेश आहे. मच्छिमार गावांच्या प्रतिनिधींनी सांगितले की, उत्तर चेन्नईतील चिन्नाकुप्पम, पेरियाकुप्पम, नेताजीनगर आणि बर्मानगर या भागांना या वायूगळतीचा फटका बसला आहे.