Pahalgam Attack Live Updates : सध्याची वेळ ही देश एकत्र ठेवण्याची आहे-शरद पवार

“भारतवासीयांवर हल्ला झाला आहे. त्यामुळे राजकारणात मतभिन्नता असेल. पण जेव्हा देशावर हल्ला होतो तेव्हा मतभिन्नता नाही. आत्ता भूमिका एकच देश एकत्र ठेवणं. त्यानंतर या गोष्टींचा विचार करतो. गेल्या काही दिवसांपासून आपण पहलगामचा विषय ऐकत आहोत. अतिरेक्यांनी हल्ले केले. निष्पाप लोकांचा बळी घेतला. जे काही घडलं ती घटना देशाला धक्का होती. हा कुठलाही जाती-धर्माला धक्का नव्हता. हा भारताला धक्का होता. भारतवासीयांवर हल्ला झाला. आता देशवासीयांसाठी ही जबाबदारी असते की राजकारणात ही मतभिन्नता नाही. केंद्र सरकारने दहशतवादी हल्ल्यानंतर सर्वपक्षीय बैठक बोलवली. त्या बैठकीला आपल्या पक्षाकडून सुप्रिया सुळे उपस्थित होत्या, देशाच्या गृहमंत्र्यांनी अत्यंत समंजस भूमिका घेतली. त्यांनी हे सांगितलं की कुठेतरी कमतरता आमच्याकडून झाली. या कमतरतेवर आज चर्चा नाही. ज्यांच्यावर हल्ले झाले त्यांच्या कुटुंबीयांमध्ये विश्वासाचं वातावरण कसं निर्माण करता येईल हे आता पाहिलं पाहिजे.” असं शरद पवार यांनी म्हटलं आहे.

राष्ट्रीय तपास यंत्रणेकडून दहशतवाद्यांचा ठावठिकाणा शोधण्याची मोहीम अधिक तीव्र करण्यात आली आहे. दशहतवाद विरोधी एजन्सीचे आयजी, डीआयची आणि पोलीस निरीक्षक यांच्या देखरेखीखाली काश्मीर येथील हल्ल्याचे जे प्रत्यक्षदर्शी होते त्यांची चौकशी शांतपणे केली जाते आहे आणि दहशतवाद्यांचा काही ठावठिकाणा मिळतो का ते तपासलं जातं आहे.

"पहलगाम हल्ल्यात ज्यांना जीव गमवावा लागला त्यांच्या कुटुंबाच्या दुःखात मी सहभागी आहे. ज्या प्रकारे या निरपराध लोकांना मारण्यात आलं ती बाब अत्यंत निंदनीय आहे. घरातला माणूस गमावणं आणि त्यानंतरचं होणारं दुःख हे मला माहीत आहे. ज्या प्रकारे पर्यटकांची हत्या केली ती भीतीदायक आणि दुःखदायक बाब आहे. पंतप्रधान नरेंद्र मोदीही याबाबत आपल्याला आवाहन करत आहेत. प्रत्येक भारतीय हिंदू, मुस्लिम, ख्रिश्चन हे आधी भारतीय आहेत. ज्या प्रकारचा दहशतवाद आपल्या देशात माजवला जातो आहे त्यामुळे आपल्याला सगळ्यांनाच सतर्क राहिलं पाहिजे. आम्हीही ठरवलं होतं की काश्मीरला जायचं, तिथे सिनेमाचं शुटिंग करायचं त्यातच ही घटना घडली. या दहशतवाद्यांनी आपल्याला एक प्रकारे आव्हान दिलं आहे. त्याचं उत्तर आपण दिलं पाहिजे असं स्मिता ठाकरे म्हणाल्या.

“अहिंसा हे भारताचं मूल्य आहे. भारताचा तो विचार आहे. आपली अहिंसा लोकांना अहिंसक करण्यासाठी आहे. काही लोक अहिंसक होतील पण काही जण नाही बनणार नाही. तुम्ही काहीही करा त्यांना अहिंसक व्हायचं नसेल असेच हे असतील. तसंच तुम्हालाच नाही तर सगळ्या जगाला उपद्रव करतील. रावणाचा वध त्याच्या कल्याणासाठी झाला आहे. शिवभक्त रावण, वेद माहित असणारा, उत्तम प्रशासक रावण. असे चांगले गुण रावणाकडे होतेच. पण त्याने जे शरीर, मन बुद्धी स्वीकारली त्यामुळे या चांगले गुण त्याच्यात येऊ दिले नाहीत. त्यामुळे ते शरीर, मन, बुद्धी संपवली गेली. त्यामुळेच रावणाचा संहार केला. रावणाचा संहार म्हणजे हिंसा नाही ती अहिंसाच आहे. अहिंसा आपला धर्म आहे. पण आततायी लोकांकडून मार न खाणं आणि गुंडगिरी करणाऱ्यांना धडा शिकवणं हादेखील आपला धर्म आहे.