जम्मूमध्ये सीमारेषेवर पाककडून गोळीबार; भारताचे चोख प्रत्युत्तर

जम्मूमध्ये सीमारेषेवर पाकिस्तानकडून घुसखोरीचा प्रयत्न गुरुवारी सीमा सुरक्षा दलाच्या जवानांनी उधळून लावला. घुसखोरीवेळी पाकिस्तान रेंजर्सकडून सीमारेषेवर मोठ्या प्रमाणात गोळीबार करण्यात आला. या गोळीबारालाही सीमा सुरक्षा दलाच्या जवानांनी चोख प्रत्युत्तर दिले.
गेल्या चार दिवसांमध्ये आठव्यांदा पाकिस्तानकडून शस्त्रसंधीचे उल्लंघन करून भारताच्या दिशेने गोळीबार करण्यात आला. जम्मूमध्ये गुरुवारी सकाळी साडेनऊच्या सुमारास खारकोलाजवळील आंतरराष्ट्रीय सीमेवर काही व्यक्ती पाकिस्तानकडून संशयास्पद हालचाली करीत भारताच्या दिशेने येत असल्याचे दिसले. यानंतर लगेचच जवानांनी ही घुसखोरी रोखण्यासाठी कार्यवाही सुरू केली. घुसखोरी रोखण्याचा प्रयत्न सुरू झाल्याचे लक्षात येताच पाकिस्तानकडून भारतीय छावण्यांच्या दिशेने गोळीबार करण्यात येऊ लागला. त्याला तातडीने प्रत्युत्तर देण्यात आले. दुपारी दीड वाजेपर्यंत पाकिस्तानकडून भारताच्या दिशेने गोळीबार सुरूच असल्याचे सीमा सुरक्षा दलाच्या अधिकाऱयाने सांगितले.