पाकिस्तानचा स्वत:च्याच पायावर धोंडा, भारताशी सरसकट व्यापारबंदीमुळे ओढवलं मोठं संकट!

भारताने सिंदू जलकरार स्थगित केल्यानंतर इस्लामाबादने नवी दिल्लीबरोबरचा व्यापार स्थगित केला आहे. त्यानंतर काही उपाययोजना सुरू केल्या आहेत. जिओ न्यूजने दिलेल्या वृत्तानुसार पाकिस्तानने त्यांच्या औषधांच्या गरजा पूर्ण करण्यासाठी उपाययोजना राबवण्यास सुरुवात केली आहे. तिथल्या औषध नियामक प्राधिकरणाने म्हणजेच डीआरएपीने आपत्कालीन योजना तयार केली आहे. डीआरएपीमधील वरिष्ठ अधिकाऱ्याच्या हवाल्याने म्हटलं जिओ न्यूजने म्हटलं आहे की २०१९ मधील संकटानंतर पाकिस्तानने अशा प्रकारच्या आव्हानांना तोंड देण्यासाठी तयारी सुरू केली आहे. देशातील औषधांच्या गरजा पूर्ण करण्यासाठी पर्यायी मार्ग शोधले आहेत.

पाकिस्तानमधील औषध उद्योग भारतावर अवलंबून?

पाकिस्तानातील औषध उद्योग हा काही अंशी भारतातील कच्च्या मालावर अवलंबून आहे. तिथल्या औषध उत्पादक कंपन्या ३० ते ४० टक्के कच्चा माल भारताकडून आयात करतात. पाकिस्तान आता चीन, रशिया व अनेक युरोपीय देशांकडून पर्यायी स्त्रोत शोध आहे. जेणेकरून पाकिस्तानमधील औषधांची गरज पूर्ण होईल व औषधांचा तुटवडा निर्माण होणार नाही. प्रामुख्याने रेबीजविरोधी लस, सर्पदंशानंतर दिलं जाणारं औषध (वेनोम), कर्करोगावरील औषधे, मोनोक्लोनल अँटीबॉडीज व इतर महत्त्वपूर्ण जैविक उत्पादनांसाठी पाकिस्तान भारतावर अवलंबून आहे.

भारताबरोबरचा व्यापार थांबवल्याने पाकिस्तानला प्रतिकूल परिणामांचा सामना करावा लागेल

डीआरएपीने म्हटलं आहे की पाकिस्तानचा आरोग्य विभाग कुठल्याही संकटाचा सामना करू शकतो. मात्र औषध उद्योगातील सूत्रांनी व आरोग्य तज्ज्ञांनी इशारा दिला आहे की भारताबरोबरचा व्यापार थांबवल्याने आपल्याला प्रतिकूल परिणामांचा सामना करावा लागू शकतो. पाकिस्तानी सरकारने व्यापार स्थगित करण्याची घोषण केल्यानंतरही पाकिस्तानच्या आरोग्य मंत्रालयाला औषधांच्या आयातीची स्थिती स्पष्ट करण्याचे अधिकृत आदेश मिळालेले नाहीत. त्यामुळे पाकिस्तानच्या आरोग्य विभागाला व औषध उद्योगाला भिती आहे की पुरवठा साखळीत भारतामुळे येणाऱ्या या व्यत्ययामुळे औषधांची गंभीर टंचाई निर्माण होऊ शकते.