Pakistan Train Hijack Highlights : पोलिसांनी १५५ ओलिसांची केली सुटका, २७ दहशतवाद्यांचा खात्मा!

पंजाब आणि सिंध प्रांतातून बलुचिस्तानला जाणाऱ्या सर्व रेल्वे सेवा पाकिस्तानने रद्द केल्या आहेत.

पोलिसांनी १५५ ओलिसांची सुटका केली असून २७ दहशतवाद्यांचा खात्मा केला आहे. सुटका करण्यात आलेल्या प्रवाशांमध्ये मुलं आणि महिलांचा समावेश अशून त्यांना रुग्णालयात दाखल करण्यात आलं आहे.

भारताने या घटनेवर अद्याप कोणतंही अधिकृत भाष्य केलं नसलं तरी भारतीय लष्करातून निवृत्त झालेले मेजर जनरल जी. डी. बक्षी यांनी यावर प्रतिक्रिया दिली आहे. ते म्हणाले, “बलुचिस्तान आता पूर्णपणे पाकिस्तानच्या नियंत्रणाबाहेर गेलं आहे. तिथली सध्याची स्थिती व जनतेचा उद्रेक पाहता स्वतंत्र बलुचिस्तानच्या जन्माची वेळ आली आहे असं म्हणावं लागेल.”

सविस्तर वृत्त वाचा

पाकिस्तानी सरकारने या घटनेबाबत, त्यानंतर पाकिस्तानी लष्कराने केलेल्या कारवाईबाबत फारशी माहिती उघड केली नसली तरी, बलुचिस्तान लिबरेशन आर्मीने (बीएलए) जाफर एक्सप्रेसमधील सुरक्षा दलांसह २१४ हून अधिक प्रवाशांना ओलीस ठेवल्याचा दावा केला आहे.तसेच, यावेळी फुटीरतावादी व पाकिस्तानी लष्कराबरोबर झालेल्या संघर्षात लष्कराचे ३० जवान शहीद झाल्याचा दावा बीएलएने केला आहे.

सविस्तर वृत्त वाचा

जाफर एक्स्प्रेससाठी माहिती डेस्क अशी सूचना असलेली खास चौकशी खिडकी क्वेटा रेल्वे स्थानकावर सुरू करण्यात आली आहे. या खिडकीवर अपहृत ट्रेनमध्ये असलेल्या प्रवाशांची माहिती त्यांच्या नातेवाईकांना देण्यात येतेय. या स्थानकावर अत्यंत कडेकोट सुरक्षा व्यवस्था करण्यात आली आहे. परंतु, स्थानकावर भीषण शांतता आहे. काही वाहने आणि मिडिया कर्मचाऱ्यांशिवाय इथे चिटपाखरूही दिसत नाही. मुख्य तिकिट काऊंटरवरील कर्मचाऱ्यांना जाफर एक्स्प्रेसबद्दल विचारलं असता, ते शांतपणे उत्तर देतात की, साहेब आम्हाला काहीही माहिती नाही. बोलानमधून आतापर्यंत कोणतीही माहिती आलेली नाही. पाकिस्तानस्थित डॉन या वृत्त संकेतस्थळाने यासंदर्भातील वृत्त दिलं आहे.