सोल : ऑस्कर विजेता चित्रपट ‘पॅरासाइट’मधील दक्षिण कोरियाचा प्रसिद्ध अभिनेता ली-सून-क्यून (वय ४८) याचा मृत्यू झाला आहे. सोल येथे एका कारमध्ये ली-सून-क्यून बुधवारी मृतावस्थेत आढळून आला. धक्कादायक बाब म्हणजे लीची कथित ड्रग्सच्या वापराबद्दल चौकशी सुरू आहे.
उत्तर सोलमधील रस्त्यावर उभ्या असलेल्या कारमध्ये पोलीस आणि आपत्कालीन अधिकाऱ्यांना ली बेशुद्ध अवस्थेत सापडला. तो मरण पावला असल्याचे आपत्कालीन अधिकाऱ्यांनी नंतर जाहीर केले. तत्पूर्वी ली बेपत्ता असल्याची तक्रार करण्यात आल्यानंतर त्याचा शोध घेणे सुरू होते, असे सेओंगबक पोलिसांनी सांगितले. लीचा मृतदेह नंतर जवळच्या सोल रुग्णालयात नेण्यात आला.
हेही वाचा >>> चेन्नईतील खतनिर्मिती प्रकल्पातून वायूगळती; अनेक जणांना बाधा
लीने एका बार होस्टेसच्या निवासस्थानी बेकायदा ड्रग्ज घेतल्याच्या आरोपांबाबत त्याची पोलीस चौकशी सुरू होती. त्याला ड्रग्ज प्रकरणात अडकविण्यात आले आहे. तो काय ड्रग घेत आहे हे त्याला माहीत नव्हते, असे लीने आपल्या बचावात म्हटले होते, असे योनहॅप वृत्तसंस्थेने म्हटले आहे.२०२० मध्ये ‘पॅरासाइट’ या चित्रपटाला सर्वोत्कृष्ट चित्रपटासह अन्य तीन विभागात ऑस्कर पुरस्कार मिळाले होते. या चित्रपटात लीने एका श्रीमंत कुटुंब प्रमुखाची भूमिका साकारली होती.