VC Jagdeep Dhankhar: ‘संसद सर्वोच्च, त्यापेक्षा मोठे काही नाही’, उपराष्ट्रपती जगदीप धनखड न्यायालयावर पुन्हा बरसले

या निकालावर उपराष्ट्रपती जगदीप धनखड यांनी जोरदार टीका केली. सर्वोच्च न्यायालय राष्ट्रपतींना निर्देश देत आहे, अशी वेळ भारतावर येता कामा नये, अशी टिप्पणी त्यांनी केली होती. या टिप्पणीवर राज्यसभेचे माजी खासदार आणि ज्येष्ठ वकिल कपिल सिब्बल यांनी मात्र आक्षेप घेतला होता. उपराष्ट्रपतींचे विधान सर्वोच्च न्यायालयाचे महत्त्व कमी करणारे आहे, असे ते म्हणाले.

संसदेच्या वर कुणीही नाही

दिल्ली विद्यापीठाच्या कार्यक्रमात बोलत असताना उपराष्ट्रपती धनखड म्हणाले की, मी जे विधान केले ते देशाच्या हितासाठी होते. लोकशाहीत संसदच सर्वोच्च आहे. निवडून आलेले प्रतिनिधी ठरवतील की संविधान कसे असेल. संसदेच्या वर कोणतीही संस्था असता कामा नये.

जगदीप धनखड पुढे म्हणाले की, १९७५ साली माजी पंतप्रधान इंदिरा गांधी यांनी आणीबाणी लागू केली आणि १९७७ साली लोकांनी त्यासाठी त्यांना जबाबदार धरले. संविधान लोकांसाठी आहे, याबाबत कोणतीही शंका नाही आणि संसद संविधानाची रक्षणकर्ती आहे. संविधानातील आशयाचे खरेखुरे रक्षक संसदेत निवडून आलेले प्रतिनिधी आहेत. संसदेपेक्षा कुणीही स्वतःला मोठे समजू नये.

यावेळी धनखड यांनी सर्वोच्च न्यायालयाच्या निकालामध्येच एकमत कसे नाही, हेही निदर्शनास आणून दिले. ते म्हणाले, सर्वोच्च न्यायालयाने गोलकनाथ प्रकरणात प्रास्ताविका संविधानाचा भाग नाही, असे म्हटले होते. तर केशवानंद भारती प्रकरणात प्रास्ताविका संविधानाचा अविभाज्य अंग म्हटले.

लोकशाहीत मौन बाळगणे धोकादायक

लोकशाहीत खुली चर्चा होणे गरजेचे आहे. जर विचारशील माणसे गप्प राहिली, तर लोकशाहीचेच नुकसान होईल. संवैधानिक पदावर बसलेल्यांनी संविधानानुसार बोलले पाहिजे. आपण आपल्या संस्कृती आणि भारतीय असण्यावर गर्व करायला हवा. देशात अशांतता, हिंसा आणि सार्वजनिक संपत्तीचे नुकसान होता कामा नये. गरज पडल्यास अशा लोकांविरोधात कडक पाऊले उचलावीत, असेही उपराष्ट्रपती जगदीप धनखड म्हणाले.